(Aruba) Lector ta desea pa avionnan di InselAir ni bula den espacio aereo riba nos casnan

Mirando cuanto problema ta pasando aworaki cu e avionnan di InselAir, un lector a indica cu e ta desea pa Aviacion Civil di Aruba duna un orden pa no laga e avionnan bieu aki di e compania, bula y pasa den espacio aereo riba nos casnan na Aruba.

E ta referi ora e avionnan ta bin for di Curacao, y tin biaha ta bula mey-mey riba e isla di Aruba pa asina nan por bira despues pa nan final approach na Aeropuerto, of despues di a lanta vuelo, ta bula bay pariba pasando riba Sabana Basora, etc.

“Abo lo sintibo sigur na bo cas, cu bo yiunan ta hunga den cura di cas, sabiendo cu un avion posiblemente un-safe ta bula riba bo dak di cas pasa bay?” Ya caba personal di US Consulate a haya orden pa no bula den InselAir su avionnan. Tambe personal di Gobierno Hulandes no mag di bula den e avionnan bieu ey.

Pesey e ta djis desea pa Gobierno di Aruba haci algo pa proteha tur habitante riba e isla, y no laga e avionnan aki bula riba daknan. Nan por haci nan final approach riba lama, y despues di take-off nan mag di bira mesora rumbo pa espacio riba lama, pa asina sigui pa Curacao.

Fuente: http://www.diario.aw