(Aruba) Reunion den Autoridad lo deporta e “Turistanan Venezolano” cu a gaña e atraco riba nan na Perle D’or

“Gañamento tambe ta algo castigable! Kizas mihor ta pa enhuicia nan prome, y despues deporta nan!” Esey ta algo di e reaccion cu a ricibi Dialuna caba, ora cu a bira conoci cu e storia di atraco riba e hotel Perle D’or na Boegoeroei, ta completamente falso.
E storia original ta cu Diadomingo anochi a bati alarma pa un caso di atraco arma riba turistanan den nan camber na compleho di apartamento Perle D’or situa na Boegoeroei.

E prome informe ta cu tres hende muher a wordo atraca den nan camber (cu a wordo habri cu un yabi) door di un hende muher acompaña pa dos hende homber di habla hispano, cu un arma di candela den man y cara tapa.

E turistanan e anochi ey a declara cu e atracadornan a bay cu mas of menos 1.000 Dollar. Tambe nan a conta storia, di a “reconoce” e muher cu a drenta cu e yabi prome den e camber.

E muhernan turista a bisa, cu nan ta na Aruba pa un photo session pa un calender.

Pero, investigacion tactico di Polisnan di “Atraco Team” a determina cu e keho entrega tabata falso y cu na ningun momento a atraca e turistanan aki! E hotel tabata yen y ningun hende a mira nada straño e anochi ey.

Ta trata aki di 3 turista femenino procedente for di Venezuela. Ora a investiga nan estadia a saca afor cu nan tabatin 2 siman caba ilegal riba nos isla. E di 4 dama cu tambe tabata envolvi, a presenta su mes awe dialuna boluntariamente pa entrega su mes na autoridadnan, despues cu el a tende cu a detene su amiganan pa a entrega keho falso na Polis y pa nan permanencia ilegal riba Aruba.

Investigacion di Recherchenan di e ekipo anti atraco a conclui cu na ningun momento un atraco a tuma luga na e compleho di apartament y por a prueba tambe cu esey ta e realidad. E motibo pa purba gaña algo asina no ta conoci.

Polis a entrega e 4 “turistanan” aki awor den man di Warda nos Costa cu lo regla nan deportacion pronto back pa Venezuela.

Fuente: http://www.diario.aw