(Aruba) Gobernador a firma e cambionan haci den ley di all inclusive

E cambionan haci den “vergunnings verordening” mihor conoci como e ley di all inclusive a worde firma pa Gobernador recientemente. E ley aki tambe ta trece regulacion pa “other accommodations” (apartamento, villa, condominiums etc. cu ta worde gehuur na turista).
Awor “other accommodations” tambe lo mester paga e porcentahe di belasting cu ta pertenece na nan tipo di negoshi, cu esaki lo tin mas control y lo percura cu tur cu ta huur camber of otro tipo di acomodacion ta cumpli cu nan deber fiscal.

Na augustus 2016 e ley di all inclusive a worde aproba den Parlamento, cu esaki gobierno kier a regula e cantidad di cambernan all inclusive riba e isla, mirando cu nos economia ta depende pa casi 90% di turismo. Cu e regulacion aki ta mantene un balans entre e diferente tipo di acomodacion y tambe ta haci cu tur stakeholder (restaurantnan, taxista, watersport etc.) ta keda disfruta di e beneficionan di e industria turistico.

Ministerio encarga cu turismo ta para tras di e cambio aki cu sigur lo beneficia nos turismo y ta algo na bienestar general di Aruba.

Fuente: http://www.diario.aw