(Aruba) Hues a condena Venezolano cu a haci atraco arma riba oficina di number na 4 aña di prison

E homber Venezolano G.B.B., ayera mainta su consenshi a remorde. Despues di cada rato ta para riba cu e no a haci e atraco arma, ora Hues tabata presenta e pruebanan na dado momento el a bisa cu e ta admiti.

Fiscal a exigi 3 aña y 6 luna di prison p’e pero Hues ta haya e castigo mucho abou. Hues a subi e castigo na 4 aña di prison y a bisa cu esaki ta entre otro pa manda un señal bon cla na esnan den problema financiero, cu na Aruba no ta tolera atraco arma.

ACUSACION:

E acusacion cu Fiscal a presenta contra G.B.B. ta cu dia 7 Januari 2016, el a haci un atraco arma riba un oficina di number. El a pone arma riba e dama cu tabata traha den e oficina y a bay cu 350 Florin.

SOSPECHOSO TA NENGA:

Ora Hues a puntra G.B.B. si el a haci e atraco arma, G.B.B. a bisa cu e no a hacie. El a bisa Hues cu e tabata huma marihuana patras di su cas den mondi y no sa nada di atraco arma.

Hues a mustra cu segun e procesverbaal, Polis a worde informa di un atraco arma y nan a bay na e oficina di number unda esaki a sosode. E hendenan a mustra e mondi unda e atracador a drenta na Kudawecha.

POLIS TA GARA SOSPECHOSO:

Polis a haci investigacion y a bin haya G.B.B. hunto cu otro persona. Polis a haya e arma di candela y un mascara.

Hues a mustra cu e dama G., victima di e atraco arma, a bisa cu e atracador a saca un arma di candela riba dje y a saca un saco for di su paña y a bisa G. pa pone e placa den e saco.

E dama a bisa e atracador cu e no tin placa. E ora ey e atracador a bis’e cu si e no pone e placa den e saco, e lo tir’e. E momento ey segun e dama G., e atracador mes a bay tras di e caha y a habri e caha y coy e placa. E atracador a core bay y e dama a bay su tras y pafor a grita cu el a worde atraca. Segun e dama G., e atracador a bay cu 350 Florin.

E dama G. a bisa cu e persona cu a haci e atraco arma, ta parce e persona cu na November 2015 a haci atraco arma caba riba e oficina di number.

MENAZA OTRO HENDE CU ARMA:

Hues a mustra cu un otro persona, cu tabata den auto a bisa cu e atracador ora e tabata pafor di e oficina di number, a dirigi arma riba dje. El a sinti su mes hopi menaza y a kere cu e atracador lo tir’e. El a mira e atracador core bay den direccion di mondi. Despues el a mira e persona aki sin mascara y a reconoce na su forma di bisti. E homber a mira cu e atracador tabata scondi patras di un mata di kwihi.

Hues a mustra cu e otro persona deteni cu G.B.B. a declara cu ta G.B.B. a bay haci e atraco pa yuda su famia.

SOSPECHOSO TA ADMITI:

G.B.B. na dado momento a bisa Hues cu e ta admiti di a haci e atraco arma. Hues a puntr’e con el a yega na e arma. Segun G.B.B. el a haya e arma patras di su cas den mondi. El a bisa cu el a bay huma marihuana den mondi y a hay’e.

Hues a remarca cu for di hopi cu a worde haya cu arma ta bisa cu a haya esaki benta abao. El a bolbe puntra e sospechoso unda el a haya e arma. Segun G.B.B., el a haya e arma benta abao. Hues a puntr’e si e sa con hende ta sinti ora nan worde atraca. Segun G.B.B. el a yega di worde atraca na Venezuela y a keda hopi spanta. Hues a remarca cu G.B.B. sa con e victima a sinti.

Hues a keda insisti pa G.B.B. bisa unda el a haya e arma. E sospechoso a keda bisa cu el a hay’e benta abao. Ta asina cu for di October 2016 el a bin Aruba cerca su ruman y a keda. Hues a bisa cu na Venezuela tin hopi problema y ora G.B.B. worde laga liber, e lo worde saca for di Aruba. El a puntr’e kico e lo bay haci na Venezuela. Segun G.B.B. e lo bay siña pa despues busca un trabao.

EXIGENCIA FISCAL:

Fiscal a bisa Hues cu e ta haya legalmente proba cu G.B.B. a haci e atraco arma. El a mustra cu empleado di oficina di number a haci denuncia di atraco arma. Ademas tin un persona cu a bisa cu e ta reconoce e atracador. Tin video caminda ta mira e sospechoso cana bay na e oficina. A haya G.B.B. den mondi cu e arma, mascara y e paña cu el a cambia.

Fiscal a mustra cu awor den Corte, G.B.B. a admiti di a haci e atraco arma.

Fiscal a bisa cu e ta condena e hecho cu G.B.B. ta haci atraco arma riba un oficina di number. El a mustra cu e victima a keda hopi spanta y por keda cu trauma. Fiscal a sigui bisa cu e ta tene na cuenta cu ta promer biaha cu G.B.B. ta cay sera pa un delito asina.

E tambe ta tene cuenta cu G.B.B. ta ilegal na Aruba. Fiscal a exigi 3 aña y 6 luna di prison kitando e tempo cu e ta sera den KIA. El a exigi tambe pa destrui e arma y balanan. Tambe Fiscal a exigi pa confisca e paña cu G.B.B. a usa pa haci atraco. E cosnan cu a haya na e cas durante e razia cu a haci, por worde debolbe.

DEFENSA DI ABOGADO:

Mr. Mohamed a bisa Hues cu G.B.B. tabata blo desmenti cu el a haci e atraco arma. E abogado ta keda cu na dado momento G.B.B. su consenshi ta remorde y a admiti. El a bisa cu e ta referi na decision di Hues.

SENTENCIA:

Hues a sera tratamento di e caso y a pospone e caso un rato pa pensa si e lo dicta sentencia di biaha of riba otro dia.

Despues di un rato Hues a bolbe y a bisa cu e ta dicta sentencia di biaha. Hues ta haya legalmente proba cu G.B.B. a haci e atraco arma. Hues a bisa cu esaki ta un delito serio.

Na opinion di Hues, Fiscal a exigi 3 aña y 6 luna di prison, pero Hues ta subi e castigo na 4 aña di prison. El a bisa cu e motibo cu el a subi e castigo ta pasobra e acusado no a menaza e empleado so sino otro cu tabata ariba caminda.

Ademas Hues a bisa cu e kier manda un señal bon cla pa esnan cu tin problema financiero cu no ta tolera tipo di delito asina. Hues a ordena pa destrui e arma y balanan. E pañanan lo worde confisca y e cosnan cu a confisca na su cas lo worde debolbe.

Fuente: http://www.diario.aw