(Sint Maarten) Despues cu 3 homber probablemente di Siria a wordo deteni cu paspoort

Sint Maarten a wordo alarma door di detencion di 3 homber posiblemente di Siria, cu kier a drenta e parti Hulandes di e isla usando paspoortnan falso.

E personanan a yega e isla riba un avion procedente di Haiti y Diasabra cu a pasa nan kier a pasa atravez di douane di aeropuerto internacional Prinses Juliana, como turistanan Griego.

Esey no a logra y un investigacion mas di cerca di e paspoortnan, a confirma cu nan tabata falso.

Cuerpo policial di Sint Maarten ta sospecha cu ta trata di personanan di Siria.

En conexion cu e atentado terorista na Paris, polis awor ta hasiendo lo maximo pa logra haya sa e identidad real di e sospechosonan.

Tambe nan kier haya sa ki intencion e personanan aki tabata tin riba e isla Caribense.

Na e momentonan aki no ta cla si e tres hombernan tabata kier a keda na e parti Hulandes di Sint Maarten of si nan tabata tin intencion di bay na e parti Frances.

Mientrastanto polis na Philipsburg a adverti tur hende pa ta hopi alerta.

Fuente: http://www.diario.aw