(Aruba) Algun Venezolano ta abusando di nan mes compatriotanan!

Cu insistencia Matutino DIARIO ta hayando informacion, cu varios residente Venezolano na Aruba, cu tin propiedad, a laga traha den nan cura di cas apartamentonan pa huur, y cu awor nan ta huur solamente cu nan compatriotanan cu ta bin Aruba pa algun dia.

Segun informacion ta trata di apartamentonan masha chikito mes, y cu nan ta huur pa cabes, kiermen si den un espacio cinco hende por bay aden, cada persona ta paga como cien dollar pa dia. Si ta un famia di cinco hende adulto nan ta wordo cobra pa cada un y no un prijs di huur pa luna, y si tin mucha inclui pa nan tambe tin cu paga aunke un tiki menos.

Tin barionan residencial manera Wayaca, cu segun fuente fidedigna a comenta na nos, esaki ta sosode. E doñonan di propiedad ta gana balente placa, y lo ta bon pa haya sa si autoridad concerni tin control riba esaki, y si gobierno ta investiga si esnan cu ta huur ta paga impuesto riba nan entrada.

Aruba di berdad ta parce un mina di oro pasobra ta parce akinan tur cos por. Venezolanonan cu ta bin y cu ta paga adelanta na nan mes compatriotanan, nan mes ta cana conta di e abusonan aki y ta puntra hende local si nan no sa di Arubianonan mes cu tin lugar pa huur mas barata y mas comodo, specialmente e famianan cu ta bin cu mucha. Hasta na chofernan di autobus nan ta puntra y t alaga nan sa tocante e abuso cu nan mes compatriotanan ta haci cu nan!

Fuente: http://www.diario.aw