(Aruba) Na 2018 lo cuminsa explora pa petroleo of gas cu un costo minimo di 50 miyon dollar

Dialuna Minister di Turismo, Transporte, Energia y Ambiente, Ing. Mike de Meza hunto cu partnernan di Armando Curet, director di Compania Arubano di Petroleo (CAP), Jorge estavanes, Country manager Repsol, Amalia Rivera, Caribbean Basis Exploration Repsol y Alvin Koolman, Presidente di Hunta di Directiva di CAP tabata contento di anuncia cu na 2018 lo cuminsa bora pa asina cuminsa explora den awanan teritorial di Aruba. Lo haci perforacion, pero no ta descarta cu lo bora mas. Pa cu awo tin 4 luga di interes cu ta Bon Bini, Lagadishi, Dushi y Kinikini.

Desde 2009 a cuminsa investiga si den awa teritorial di Aruba lo por tin reservanan mineral. A haci un estudio completo riba esaki unda cu expertonan di diferente pais a desaroya cu tin hopi experiencia den e sector aki, a sinta cu gobierno unda cu a duna splicacion amplio con esaki lo bay.

Gobierno a subi mercado internacional y a topa cu yen compania interesa, pero despues di evaluacionnan haci a sali cu Repsol tabata esun mas atractivo pe proyecto aki. A firma un “product sharing agreement” cu Repsol, cual ta un contract cu ta incapara tur actividad, tur regla, tur calculacion, tur formula, tur proteccion den medio ambiente. Tur esaki a bay Parlamento unda a cambia e ley cu tabata existente caba, pero e ley tabata uno bieu.

A percura pa update esaki cu tur e cambionan cu a tuma luga durante e añanan, desaroyonan nobo. Despues cu tur ley a keda cambia, a firma e contract y den reunion publico a presenta esaki den Parlamento. Prome cu a dal e paso aki tabatin yen presentacion den Parlamento.

Na momento cu esaki a keda aproba, e trabounan a cuminsa unda a haci un investigacion di 2D. Na 2013 a haci un investigacion sismografico 2D di 13450 kilometer cuadra, mientras cu na 2014 a cuminsa procesa datonan for di e investigacion 2D. Aki tabata mustra yen interes pa bay na e parti panort di Aruba, unda cu a haci un investigacion di 3D.

A haci un investigacion sismografico pa mira kico ta e indicacionnan cu tin den e area specifico aki. A tuma muestra di e suela, unda a analisa esakinan pa cierto tipo di material cu a yuda na analisa e diferente areanan.

A haci uzo di heath flow y esaki tabatin di haber cu e diferente temperatura cu tin den subsuela cu ta yuda tambe, e mandatario a duna di conoce. Despues di a procesa tur e datonan y pone nan den otro, a cuminsa cu e fase di interpretacion cual despues a yega na cierto conclusion. A tuma e decision di cuminsa bora na 2018 y esaki lo keda anuncia internacionalmente. Repsol di Spaña y Total di Francia ta dos compania cu tin hopi experticio riba e tereno aki y hopi specialisa conhuntamente cu CAP y Gobierno a yega na e conclusion cu lo sigui pe siguiente fase cu ta e perforacion den subsuela di awanan rond Aruba.

E contract aki a keda firma na 2012 pero tin diferente fase den dje, Minister de Meza a indica. E termino total di e contract ta te cu 2020, pero tin diferente fase cu nan mester cumpli cun’e. “Mi por bisa cu Repsol a cumpli debidamente cu cada un di e fasenan”, el a duna di conoce. Ta asina cu e trabounan ta 2 aña delanta riba e “time line”.

Esaki ta mustra e interes di e companianan, pero tambe e cooperacion entre Gobierno y e companianan aki pa cu e investigacion aki. Gobierno ta sumamente contento cu a yega na e parti aki, pasobra tin hinca miyones di dollar den e proyecto aki pe companianan Repsol y Total. Awo lo sigui cu e siguiente fase y esaki tambe ta basta costoso. Niun hende no lo haci’e si e interes of probabilidad lo ta positivo.

Den e mita di otro aña lo tuma luga e perforacion di prueba y esey lo por ta entre e lunanan di April y Juli. Gobierno ta premira e luna di Mei. Minister de Meza a remarca cu e ta hopi trabou debi cu tin hopi material mester keda prepara, contractnan cu e compania cu ta bin haci bora mester keda prepara, mester prepara henter e crew cu lo ta trahando riba e parti aki.

Ta kere cu lo tin casi 200 persona pa ta riba e barconan cu lo sostene e boor toren. E ta hopi preparacion, pasobra tin pipanan cu mester manda abou y cada perforacion ta diferente y cada parti rond mundo ta diferente. Otro aña na momento cu e trabounan di bora cuminsa lo tin 1 boor toren, pero esey no lo descarta si despues lo bin mas di esakinan.

Fuente: https://www.diario.aw