Maletero na aeropuerto di Punto Fijo a fayece tragicamente

Diasabra anochi e maletero Pedro Rafael Sanchez Zarraga di 64 aña, a perde su bida tragicamente ora cu un auto a dal e na su caminda pa cas. Rafael mihor conoci como “El Guaro, Pedrito of Pedro Tromp” ta un persona hopi conoci pa e Arubianonan cu ta biaha pa Venezuela. E ta e prome persona cu bo ta topa cune manera bo yega y e ta cla pa atende cu tur hende mesora. E mes ta handle bo maletanan y ta atende mesora cu e personanan malo. Un persona sumamente humilde y cu un gran curazon pa su trabao di maletero.
Pedro a caba di atende cu su pasaheronan di Aruba na aeropuerto, cu a yega Punto Fijo Diasabra anochi y manera custumber a atende tur hende cu un sonrisa. Pero na caminda pa su cas, cu no tabata mucho leu di e aeropuerto el a wordo gedal pa un auto cu tabata core sin luz, riba e caminda principal cu ta comunica Guanadito noord cu zuid.

Pasaheronan cu a topa Pedro pa ultimo biaha Diasabra anochi, a keda den shock ora cu nan a yega aeropuerto Dialuna pa biaha pa Aruba bek y a tende e noticia tristo aki. Su yiu homber y famia a bisa na un pasahero cu nan kier gradici tur Arubiano y tur esnan cu a conoce Pedro, masha danki pa e cariño y amor cu nan tabata tin pa nan tata. Tabata tin Arubianonan di bon curazon ta laga un regalo na airport pa e famia, aunque segun e famia cu nan no a pone box ni a pidi nada, pasobra Pedro no tabata un persona asina. E tabata contento di e trabao cu e ta eherce pa mas di 40 aña, cu amor y dedicacion y tabata stima su hendenan di Aruba.

Dialuna Pedro a wordo hiba pa su ultimo lugar di sosiego, caminda nan a pasa cu ne prome na aeropuerto pa su coleganan despedi di dje y por a mira un cantidad di persona yorando pa perdida di nan amigo stima. (PULSE AQUÍ PARA VER MÁS)

Fuente: http://www.diario.aw