(Aruba) DOW a usa 35.000 meter cubico di santo blanco pa restaura beach na Divi

Por bisa cu practicamente e trabaonan di recuperacion di beachnan di Aruba, despues di pasada di Horcan Matthew a keda cla. Den combersacion cu ing. Marlon Croes, director di DOW, el a splica cu nan ta satisfecho con funcionarionan a duna tremendo cooperacion pa restaura e beachnan y otro areanan di Aruba cu a worde afecta.

Croes a recorda cu na final di september horcan Matthew a pasa panort di Aruba y danki Dios cu no a sufri hopi daño, cu excepcion di e beachnan.

E beach for di Bushiri bayendo direccion di Divi Divi a bay practicamente completamente perdi. E parti entre Divi Tamarijn y Divi Divi mientrastanto a yena back, cu ta prueba cu e coriente di lama a normalisa. Loke cu a constata tambe tabata cu hopi yerba di lama a worde tira na costa y cual a worde haci limpi den e fin di siman di 30 di september pa 1 y 2 di october. Den e periodo cortico a keda cu limpiesa di mayoria di beach.

Sinembargo e “swelling” di lama riba dia 4 di october, a causa otro daño na e beach, mata y animalnan di lama. Esaki tabata un consecuencia di e mesun “Matthew”. Esaki a trece hopi yerba, piedra y baranca riba beach y caminda. Un biaha mas personal di DOW a pone man na obra, haciendo uzo di diferente tipo di ekipo. E biaha aki a constata cu den e area di Hyatt y Occidental masha hopi “zeewieren” a worde tira na costa di Aruba. A cuminsa cu un limpiesa cu a dura for di diaranson te cu diadomingo pa finalisa cu tur trabao. A haci uzo tambe di e ploegnan cu normalmente ta haci limpi na otro areanan di Aruba. A montona tur e yerbanan pa awor nan worde transporta pa Barcadera.

Fuente: http://www.diario.aw