(Aruba) Parlamento ta pidi documentonan y acuerdo cu Citgo firma na Venezuela

Parlamento di Aruba a manda un carta pa Gobierno unda cu a pidi tur e informacionnan y tambe acuerdo cu a worde sera recientemente y cu parlamento mester haya sa den medio di comunicacion cu tin un acuerdo cu e keda sera cu Gobierno pa loke ta trata e reapertura di e refineria.
Presidente di Parlamento ta duna di conoce cu te cu awe parlamento no a ricibi copia di e documentonan aki cu ta relaciona di loke cu gobierno a dicidi den nomber di Aruba.

Sinembargo diferente miembro di parlamento tanto MEP y AVP a pidi pa haya un reunion publico caminda cu nan lo por haya informacion riba e documentonan aki, pero tambe pa haya transparencia debi cu te cu awe ningun di e parlamentarionan no a haya ningun informacion y ta pesey mes ta pidi presencia di Minister Mike de Meza, Mike Eman y tambe Paul Croes.

Presidente di parlamento Marisol Lopez Tromp ta duna di conoce como presidente di parlamento su tarea ta pa manda un carta pa gobierno refiriendo na e peticionnan aki di e miembronan di parlamento debi cu prome cu e acuerdo aki a worde sera parlamento no a haya informacion riba e detayenan pa asina por duna un aprobacion of un direccion riba e punto aki.

Loke ta di lamenta cu Parlamento di Aruba cu ta e organo di mas halto na Aruba mester haya informacion via medionan di comunicacion, esaki ta indica cu e proceso di trabao no ta canando den e canalnan corecto. Presidente di parlamento ta spera cu gobierno por manda e documentonan aki mas pronto cu ta posibel pa asina prepara pa e leynan cu mester bin parlamento y cu e parlamentarionan ta prepara pa nan worde trata. Loke mester ta aclaria ta cu tur acuerdo cu gobierno cera ta den nomber di Aruba , semper ta normal pa e bin parlamento prome, esaki no ta trata solamente den e caso di e refineria pero cualkier otro acuerdo grandi.

Segun Presidente di parlamento por corda por ehempel algun aña atras riba e asunto di CFT lo tabata importante pa a bin parlamento prome cu cera cierto acuerdonan y locual cu no a sosode e tempo ey tampoco y na unda cu parlamento a haya su mes cu un ley pa trata despues.

Esaki ta importante mirando cu e negociacionnan pa e refineria tin un acuerdo cera di un magnitud grandi cu no ta conta solamente pa awo , pero lo mara aruba pa algun decada y te hasta na unda cu e ministernan y parlamentario nan actual lo no tey mas. E acuerdonan aki ta keda cera pa pais Aruba y no pa un partido of gobierno su minister of pa parlamento pero pa pais Aruba. Presidente di Parlamento Marisol Lopez Tromp ta kere cu ta mas cu importante pa parlamento haya un bista prome pa asina parlamento tambe duna su input y of su deseonan y sugerencianan den e parti aki.

Tambe tabatin mocion nan cu a keda trece padilanti den reunionnan publico den pasado riba e topico di refineria. Un mocion ta un deseo di parlamento , pero unabes cu gobierno ta bay pa sera un acuerdo concreto pa mara pais Aruba , legalmente ta na su luga pa parlamento di Aruba haya informacion prome cu firma e acuerdo.

Sinembargo varios miembro di parlamento a tuma nota den publicidad di diferente informacion , pero parlamento mes no a ricibi nada. Parlamento di Aruba ta spera cu mas pronto cu ta posibel gobierno haci entrega di e documentonan aki pa asina por yama un reunion publico pa trata e topico di e refineria.

Segun presidente di parlamento cu no por ta asina cu un acuerdo asina grandi manera esun di e refineria cu durante di un reunion lo e keda presenta na parlamento y pa e ora ey e worde studia. Pesey mes den e carta ta poni cu ta hopi importante cu parlamento haya e documentonan y contenido di tur loke ta documentonan relevante y cu por yuda e parlamentarionan den tratamento publico na nivel y cu tin sentido.

Fuente: http://www.diario.aw