(Aruba) Inversion di Citgo Petroleum Corporation na Aruba ta entre 700 miyon y 1 biyon dollar

700 miyon dollar ta e inversion minimo cu Citgo Petroleum Corporation ta bay realisa riba e facilidadnan na San Nicolas pa comberti esaki den un ‘upgrader’ di crudo. Asina Minister di Energia, Ing. Mike de Meza a splica miembronan di prensa. E cifra exacto ta dificil pa bisa mirando cu ta despues cu e trabounan cuminsa y avansa, lo tin un idea mas detaya.

Un parti di e inversion aki ta un sistema di suministro di gas cu ta core for di tereno enorme na Venezuela y lo yega Aruba bou di lama. E proyecto aki ta forma parti di e exigencia di parti di Gobierno di Aruba pa e planta ta uno mas ‘green’ den su forma di opera.

Minister de Meza ta admiti cu “e inversion ta uno basta cuantioso.” Riba papel e ta casi un biyon dollar, pero ta na momento cu bay aden y haci un inspeccion hopi mas detaya y cuminsa traha riba paketenan cu ta bay ehecuta, e ora ta haya e cifra final cu ta mas specifico. “E lo ta minimo 700 miyon Dollar,” asina e titular di energia a indica.

Tambe a splica cu e gas ta bin for di e tereno grandi cu yama ‘Perla 4 Cardon’ y ta ubica den e awanan teritorial di Venezuela. For di eynan ta core un liña di gas bou awa dirigi pa e area di Cardon den Peninsula di Paraguana. Di eynan e ta drenta lama bek direccion Aruba y ta subi banda di e refineria.

Manera anuncia anteriormente, un di exigencianan estableci dor di Gobierno di Aruba na CITGO, ta pa e planta opera di e manera mas ecologico cu por. E uzo di gas ta acopla na un proyecto di ‘Carbon Capture’ caminda ta coy e emision di carbon cu normalmente ta bay den atmosfera. Den e caso aki ta uza e e material emiti pa cultivo di alga (algen) cu, na su turno ta wordo uza como un recurso sostenibel den fabricacion di otro productonan; por ehempel, cosmetica y habon.

Fuente: http://www.diario.aw