(Aruba) Ta combini Venezuela pa Citgo opera Aruba su refineria pa asina upgrade su crudo pisa

Gabinete Mike Eman II den negociacion cu e compania Citgo, interesa pa habri e refineria, no a haci esaki lomba contra muraya. Esaki ta danki na e “settlement agreement” cu Gabinete Mike Eman I a pone como base cu a logra e reapertura bou di Valero algun aña atras. Un otro motibo ta cu Venezuela mes tin mester di un refineria manera esun di Aruba pa por procesa su crudo pa crudo cu e por mercadia na un prijs mucho mas halto.
Minister Mike de Meza, hunto cu su comision ta negociando pa basta tempo caba cu Citgo y ya caba a firma diferente acuerdo, manera e ‘heads of agreement’ cu a tuma luga na december. Awor ta yegando na un punto culminante, pa fin di maart, ora cu e acuerdo final mester tuma luga. Algo cu tanto cu tanto Minister Mike de Meza como su team negociado, encabesa pa Alvin Koolman, ta sigur di lo logra.

Gobierno a pone un periodo den cual un decision definitivo mester cay pa loke ta e refineria, ya cu e area di San Nicolas mester sigui worde desaroya. No por pone e refineria sin mas un banda, ya cu su reapertura, cu un acuerdo probablemente di 25 aña, lo percura pa cantidad considerabel di cuponan di trabao y mas ainda indirectamente cu e diferente contratistanan cu lo worde uza, principalmente den e prome dos añanan.

Prome Minister Mike Eman na momento cu e posibilidad aki tabata birando cada bes mas factibel, a pidi pa e refineria ta cuadra pa gran parti cu e maneho “green” di su gobernacion. Asina a logra cu pa operacion di e planta ta bay uza gas cu ta emiti mucho menos sushi cu si haci uzo di azeta pisa.

Loke ta importante den e negociacion aki, segun Alvin Koolman a splica, cu Aruba no tin cu inverti. Valero ta dispuesto pa entrega e refineria, cu tin un balor di algun biyon Dollar, pa un suma simbolico. Aruba ta haya e refineria pa por yega na un acuerdo cu Citgo, cu lo trece hopi beneficio pa pais Aruba.

Venezuela, segun analistanan mes ta bisa, (esta PDVSA) no tin e recursonan pa construi un refineria cu mester pa upgrade e crudo pisa cu nan tin y cambie pa uno sintetico, cual ta worde uza den otro refinerianan pa produci combustibel, manera gasolin y Jet Fuel. Venezuela mes tin 4 di e tipo di refinerianan aki (upgraders) den sociedad cu empresanan manera Total SA y Chevron Corp, pero no tin e recursonan pa inverti den construccion di upgraders. E inversion ta mucho mas cu 7 biyon Dollar y lo tarda por lo menos mita decada pa por drenta den operacion. Den caso di e planta na Aruba, Citgo ta inverti mas o menos 2 biyon Dollar y e por cuminsa upgrade crudo pisa di Venezuela den un poco mas di 1 aña. Na mundo no tin mucho di e upgradernan aki. Canada tin di e tiponan aki, pero pa procesa nan mesun azeta pisa. E hecho cu Aruba ta keda cerca di Venezuela ta un bentaha hopi grandi.

Pa Alvin Koolman, y analistanan internacional, e refineria na Aruba ta e alternativa obvio riba construccion di un propio refineria. E lease di e refineria na Aruba ta mas viable y ta costa nan menos placa y ta tuma menos tempo pa cuminsa cu procesamento di e crudo pisa. Pa Aruba e convenio cu Citgo ta uno hopi interesante, specialmente si mira cu Aruba ta lease e refineria na Citgo pa un total di 20 miyon Dollar anualmente y ta paga un minimo di 10 miyon Dollar anualmente di impuesto riba ganashi. Esaki ta banda di tur otro impuesto cu e refineria ta bay genera, manera loonbelasting, AOV AZV etc.

E refineria na Aruba tin e capacidad di procesa mas menos 235.000 bari pa dia, segun datonan di Bloomberg. Esaki ta hopi necesario pa Venezuela, cu su economia ta depende riba PDVSA pa casi tur e exportacionnan di e nacion. E produccion di Venezuela a cay cu 5.5 porciento den e ultimo cinco añanan pa 2.48 miyon bari pa dia.

A base di tur e puntonan menciona, “e refineria na Aruba ta masha importante pa e crudo di Venezuela. Sin e posibilidad pa aumenta nan produccion, e economia di Venezuela no ta crece,” e experto Arubiano Alvin Koolman a splica.

Mester corda cu e refineria na Aruba no ta bay produci un producto final, si no ta converti e crudo den un crudo-sintetico cu si tin hopi demanda pe y ta worde cumpra na un balor mucho mas halto. Na mundo tin masha poco refineria cu por procesa e crudo pisa.

Fuente: http://www.diario.aw