(Aruba) Minister de Meza a duna splicacion amplio na Parlamento riba e status di refineria

Den su presentacion den Parlamento Minister encarga cu Asuntonan di Energia ing. Mike de Meza a papia ampliamente riba dos topico cual ta e situacion di e refineria cu tin un interesado, esta Citgo, y exploracion di gas den awanan teritorial di Aruba.

Segun e mandatario a splica den 2015 e tabatin 3 of mas encuentro cu e comision di energia di Parlamento durante cual a entrega tur informacion disponibel riba e temanan menciona. For di september, despues di firma un MOU cu Valero, a cuminsa papia cu e compania interesa pa tuma e refineria over.

Pa loke ta e refineria, mester a yega na un compania cu tin un partner strategico cu ta suministra e crudo necesario pa worde procesa. Tabatin diferente compania interesante pero niun a cumpi cu e condicionnan. Den 2014 a cuminsa combersacion atrobe cu PDVSA pero via di CITGO cu ta esun cu lo atende cu negoshinan internacional.

A topa varios biaha cu Citgo riba e potencialnan di e refineria, y e combersacionnan aki, el a conta, cada biaha tabata tumando un direccion mas positivo. A firma un MOU den cual a pone un “timeline” cu mester sigui, Si tres aña pasa y no tin operador nobo, esun actual mester desmantela e refineria, esta Valero.

E compania Mericano aki despues di 8 aña tabata kier a cuminsa cu desmantelacion pasobra no tabata haya un operador nobo. Pero a delibera cu Valero pa wanta un poco mirando cu tin combersacion andando cu Citgo. Pa Valero e tabata urgente pa desmantela pero Gobierno mes no a duna aprobacion pa desmantelacion ningun momento.

E fase di prome di januari pa 31 di maart ta e periodo unda cu mester dicidi si tin un operador pa e refineria. A cuminsa discuti e “business model”, unda cu pais Aruba ta bira doño di e refineria. Lo mester lanta un compania cu ta bira doño di tur propiedad riba Sero Colorado y lo supervisa cu e tereno ta keda manera cu na momento cu e lease cuminsa. Den e acuerdo ta papia di inversion y e rol di cada partido.

Den e deliberacion hiba ta papia cu Gobierno no ta participa den Capital Investment, solamente Citgo, y tampoco den e proyectonan relaciona cu medio ambiente. Tambe mester duna e procedura ora cu kier cera refineria of kibra e contracto y su consecuencianan. Asina e mandatario a papia hopi riba e aspectonan tecnico pa loke ta e ultimo palabracionnan cu mester yega na dje prome cu e apertura.

Si el a menciona cu kier un operacion mas berde pa cual a combersa riba uzo di gas den operacion di e refineria. E uzo di gas lo tin hopi beneficio, stikstof dioxide y tur otro componente toxico pa medio ambiente su emision lo worde baha cu 99%. E carbon monoxide su emision ta worde baha cu 25%, cu lo ta un cambio positivo pa medio ambiente.

Fuente: http://www.diario.aw