Tur tres atracador di Excelsior Casino deteni na Aruba mes

E team special cu a ser crea pa investiga e atraco violento y grandi na Excelsior Casino di Holiday Inn, aparentemente a logra dal un bingo grandi Diadomingo anochi laat. Aunke algun medio di internet a publica informacion eroneo cu uno di e atracadornan a huy caba… a resulta cu esey ta puro mentira.

Polis trahando incansablemente, a pone cu na final, a detene tur tres sospechoso cu a comete e atraco arma riba Excelsior Casino. Esaki algo pasa di 11’or di Diadomingo anochi.

Polisnan cu diferente team a sera e area di San Nicolas for di trempan y insisti pa un buskeda den e area pariba di Prison di KIA y vecindario di Golfweg etc. Tur vehiculo cu a pasa, a wordo para y listra.

Na final poco despues di 11’or, a detene tur tres atracador den Golfweg cu Brandarisweg direccion DeVuyst. E atracadornan tabata na pia riba caminda.

Pa seguridad no a permiti ningun hende di prensa yega cerca, ni tampoco ora cu a trece e detenidonan bao escolga pisa, bek pa Centro di Husticia na Macuarima.

Pabien Polis cu boso tremendo trabao. Dialuna via Ministerio Publico lo tende mas di e accion aki.

Observatie Team. Arestatie Team, Riot Team ta algun di esnan cu a haci un tremendo trabao henter anochi. A para varios auto sospechoso. E atracadornan no por a huy ainda for di Aruba pasobra tur frontera tabata sera. Nan tabata haci tur intento pa sali. Den un forma relampago e Observatie Team a mira e tres sospechosonan y asina mesora a bati alarma. A notifica e otro coleganan cu a presenta mesora y haci e detencionnan cu arma den man.

Awe lo haya mas detaye encuanto e accion, y tambe kizas indicacion unda e placa lo a wordo scondi.

Fuente: http://www.diario.aw