(Aruba) Si tur contacto sigui positivo por spera bishita di Citgo y un MoU den futuro cercano

Minister di Energia, ing Mike de Meza y un consehero huridico a bolbe Aruba diamars for di un bishita di trabao cortico, pero intenso y intensivo cu ehecutivonan di CITGO na Houston. E reunionnan a inclui combersacionnan cu e president y CEO di CITGO.
Aunke cuateloso cu su expresionnan den un entrevista na su yegada back na Aruba, Minister De Meza a expresa cu si acaso e combersacionnan sigui riba un bon caminda y cu e positivismo actual, e ta premira un bishita di ehecutivonan di CITGO na Aruba y e firmamento di un MoU den e proximo simannan.

“E siguiente paso lo ta enberdad un MoU, cu mi ta premira cu den algun siman nos lo ta asina leu,” De Meza a bisa. E mandatario a splica cu pa yega e punto di firma un MoU cu CITGO tur dos partido lo mester a haci su evaluacion, su “due diligence” y yega na un conclusion positivo.

“Den un futuro lo nos lo por yega un momento cu nos por bay den hopi mas detaye den e tipo di operacion cu nan ta premira pa Aruba y di con e ta asina interesante,” el a agrega.

CITGO ta e operador, e inversionista y e tin aceso pa crudo; e refineria tin balor pa nan y e business model cu nan kier aplica. Ta rekeri un inversion enorme pa pone e refineria back den funcion y pa opera e refinera, Minister De Meza a expresa.

Aunke, el a añadi, cu e bon cooperacion entre Valero y gobierno di Aruba tabatin beneficio sigur den e sentido di cu Valero a mantene e refineria den un “mothball condition”. Esaki lo mester resulta den efectonan minimo riba e integridad di e ekiponan.

Minister De Meza a yega Aruba for di Hulanda diahuebs hunto cu Minister President Mike Eman y Minister Benny Sevinger di infrastructura y algun di nan conseheronan, despues di a combersa ampliamente cu gobierno Hulandes y diferente experto riba e desaroyonan nobo rond di e refineria di Aruba.

Den fin di siman, De Meza a viaha cu su consehero huridico pa Houston, Texas. El a splica cu, ademas di tin contacto via di diferente medio, ta importante pa tin reunionnan unda cu por repasa detayenan hunto, den persona, mas rapido y eficientemente. E mandatario tin dos aña den combersacionnan cu CITGO, pero ta den e ultimo lunanan e interes di parti di CITGO a intensifica y esaki tabata e di cuater viahe pa Houston e aña aki pa Minister De Meza reuni cu e ehecutivonan di e compania.

Fuente: http://www.diario.aw