(Aruba) Sea ta Hotel of Refineria

E asunto di refineria y futuro hotel den Sero Colorado a cuminsa trece un desbalance den pensamento di e gobierno actual. Mientras cu ministerio di turismo a laga su hendenan los un articulo for di un skina, a tende e abogado di Bahia Principe papia mesun idioma cu e minister.

Di otro banda a constata cu for di algun luna caba minister Mike de Meza a bay na tres diferente occasion sinta cu esnan di CITGO te na Houston. Te hasta tin un preparacion di un MOU pa firma kizas den e simanan nos dilanti despues cu bolbe for di Hulanda. E minister di turismo mes a cuminsa busca contacto cu diferente personahe pa haya un sosten publico riba su deseo pa evita apertura di refineria.

E minister ta insisti pa e hotel Bahia Principe. Awor su colega Mike de Meza y prome minister Mike Eman ta atendiendo pa mira con por tog mira un reapertura. Opocision a manda gritonan cu e reapertura di e refineria lo trece un boost grandi pa economia y caha di gobierno. Esey ta un realidad tambe. Mientras cu den pueblo mes tambe tin un diferencia di pensamento riba reapertura di e refineria, un cos ta sigur.

E refineria su reapertura lo duna empleo cu salarionan mas halto. Tambe e lo duna casi 600 trahador trabao directo, y mas cu 1000 empleo mihor paga cu Hotel cu semper ta conoci pa salarionan minimo. Trahadornan den e area di contratista trahando indirectamente cu refineria tambe lo gana bon placa. E discussion den pueblo ta si e refineria lo bin pa largo tempo. E garantia ey ta importante.

Bon lo tabata pa sinta na mesa y mira con e hotel por a bin y tambe con e reapertura di e refineria por a tuma lugar. Kizas e sentimentonan di prome minister Mike Eman mes ta mixto mirando cu e ta promove green. Pero di otro banda no por keda sin come tampoco pasobra ta keda kere den green. Gobierno su entrada lo subi grandemente cu e reapertura di e refineria.

Te hasta CFT y otro institutonan a mustra cu refineria su ausencia a causa un impacto riba gobierno su entradanan cu e consecuencianan menciona hunto cu e crisis. No ta un secreto cu e situacion di pais Aruba ta malo. Pesey awor den gobierno mes e ministernan mester bay convence otro pa mira kico ta e mihor opcion. Sea reapertura di e refineria of e proyecto di Bahia Principe. Nos por considera un escogencia di luho pasobra despues di tabata sin nada, awor tin dos opcion riba mesa. Hotelnan pa San Nicolas ta algo cu masha tempo gobiernonan tur a papia di dje.

Den gobernacion di MEP te hasta tabata tin ponemento di piedra pa hotel den Sero Colorado. Nunca mas el a conretiza. Awor e pregunta ta con sigur esaki si lo ta? Na Rodgers Beach tambe tin un hotel cu a keda di cuminsa. Tabata tin ground breaking pero a pasa un aña y te awe nada ainda. Ta parce cu ta hopi gobierno a papia di hotel pa San Nicolas pero ningun a cumpli. Awor ta tende atrobe cu tin esnan di Bahia Principe para cu 200 miyon Dollar pa cuminsa e proyecto pero problema a presenta awor cu e posibel reapertura di refineria. Kico lo pasa den e dianan cu ta bin ta bon pa sa.

Minister Otmar Oduber lo expresa su opinion diamars mainta riba e tema aki. E ta buscando base amplio rond pa sostene su pensamento y ta cuestion di mira te con leu e situacion aki lo yega den gobierno mes. No ta un secreto cu e cierre di e refineria Valero a nifica un impacto negativo di 15% di nos GDP. Un hotel hamas lo yena e buraco aki, papiando di inversion y cantidad di trabao cu efecto economico pa nos pais.

Fuente: http://www.diario.aw