(Aruba) Noticia di e avioneta cu oro ta completamente falso

Diamars atardi Minister di Husticia Andin Bikker a duna un declaracion relaciona cu un noticia cu a wordo publica den diferente medio di prensa local y internacional relaciona cu un avioneta cu lo tabata transporta baranan di oro.

E declaracion ta bisa lo siguiente:

Ministerio di Husticia den nomber di Gobierno di Aruba a haya necesario pa adresa noticianan falso cu ta circulando riba social media, cu ta bisa den esencia cu na aeropuerto Reina Beatriz recientemente lo a pone beslag riba un cargamento di oro di 932 kilo, den un avioneta procedente di Venezuela.

Lo a detene tambe e piloto y personanan den e avion y cu nan ta wardando extradicion.

Den e noticianan aki ademas ta alega cu lo tin alto funcionarionan di Gobierno como sospechoso den e supuesto caso y cu lo a prohibi autoridadnan di papia riba e tema y cu Gobierno di Aruba lo tin algo di sconde referente e supuesto caso aki.

Gobierno di Aruba ta desmenti e noticianan aki, nan no ta basa riba berdad, no tin beslag riba un supuesto cargamento di oro di 932 kilo di un avioneta procedente di Venezuela, no tin detencion ni un proceso di extradicion andando.

No a prohibi ningun autoridad papia riba e tema.

“Nos ta biba den un pais democratico cu institutonan independiente manera Ministerio Publico y ningun momento e prohibi ningun autoridad di papia riba e tema”, e mandatario a sigui enfatiza.

El a bisa tambe cu OM tambe a emiti un declaracion desmintiendo e noticia.

“Den e noticianan ta alega tambe cu e noticianan aki ta bin for di fuentenan federal di Merca”. “Sinembargo, instancianan di Aruba a check y autoridadnan Mericano no tin informacion riba e supuesto caso cual ta logico, pasobra e no a sosode”, segun Bikker kende a sigui bisa cu Gobierno kier haci un apelacion pa medionan di prensa check prome si e noticianan ta cuadra cu berdad y duna Gobierno y Ministerio Publico e oportunidad pa duna nan banda di medaya prome cu bay emiti noticianan tendencioso asina y den e proceso purba atacha e bon nomber di Aruba y su institutonan.

Fuente: Con información de Diario de Aruba