Aruba lo busca un partner pa habri refineria of start otro negoshi eynan (+CITGO)

Prome Minister Evelyn Wever Croes Diahuebs durante un conferencia di prensa a duna un update di CITGO.
“Ainda nos ta den negociacion cu CITGO, nos no ta cla ainda y mi no tin un fecha di ki dia nos ta bay keda cla”.

“Loke si mi sa ta cu nos ta bezig negociando terminacion di e acuerdo grandi cu a wordo firma na 2016”.

Prome Minister indica cu tabata un acuerdo hopi elabora, pues ta tuma tempo pa yega na un bon acuerdo di terminacion. El a agrega cu e no ta na altura di tur e detayenan ainda pasobra e no ta envolvi den tur e detayenan.

“Ta bay yega un momento si cu nos tin cu bay Parlamento prome cu firma pasobra mirando cu Parlamento a aproba e acuerdo, Parlamento mester aproba tambe e terminacion”.

“Mientrastanto CITGO a yega na un acuerdo cu tur e trahadornan”.

“E discusion tabata cu CITGO kier a paga solamente e Cesantia y no e añanan di servicio, pero despues e compania a paga ambos”, segun e Prome Minister.

El a indica cu e parti fastioso ta cu e trahadornan a keda sin trabao y ta wardando pa un operador nobo drenta pa nan por haya bek nan trabao.

“Nos no ta asina leu ainda pasobra nos no a haya e yabi di e refineria ainda”.

“Tanten nos no tin e terminacion firma, nos no por ni sinta na mesa cu otro operadornan”.

“Un vez cu tur cos keda cla cu e acuerdo di terminacion, nos ta bay publica internacionalmente cu Aruba ta habri pa negoshi, esta Aruba ta buscando un partner cu kier bin inverti den e isla”.

“E partner aki por habri e refineria porta, pero si e tin un otro idea cu e por haci na e mesun lugar, tambe nos ta habri pa scucha tur otro opcion cu por tin”.

E mandatario a indica cu tin algun condicion mara na esaki si.

Un di e condicionnan ta cu ta buscando un partner cu ta serio y tin su propio fondo y si ta petroleo su propio petroleo.

“Nos ta buscando uno cu lo paga su ‘fair share’ na Gobierno y cu ta crea cuponan di empleo pa nos mama y tatanan di famia, mientras cu e ta paga su trahadornan bon tambe”.

“E compania mester cumpli tambe cu standardnan di medio ambiente cu nos ta bay exigi akinan”.

“Despues cu publica esaki, bo tin cu duna 2 pa 3 luna pa tur hende por haya un chens husto pa expresa nan interes”.

“Naturalmente e promenan cu drenta nos lo mira, pero bo no por cera esey sin duna otronan un oportunidad husto pa mustra nan interes”.

E mandatario a sigui bisa cu despues di esaki un comision special lo evalua tur propuesta.

Fuente: Con información de Diario de Aruba