CITGO mes a indica cu nan lo kier bay for di Aruba 31 di Januari

Prome Minister Evelyn Wever Croes Dialuna a papia riba e ultimo desaroyonan rond di CITGO. Esaki durante di e conferencia di prensa di Gobierno di tur Dialuna.
“CITGO mes a indica cu nan lo kier bay for di Aruba 31 di Januari, pues nos ta den un siman hopi determinante pa wak si ta logra si of no”.

“Negociacionnan ta andando ainda pa wak si nos por haya e yabi di e refineria, pa nan no bay cu e yabi anto tene nos den corte pa hopi aña”.

Esaki segun Wever Croes, kende a sigui bisa cu ta importante pa yega na un areglo di terminacion cu CITGO pa e contrato, pa drenta e refineria mesora y drecha locual mester wordo drecha.

El a sigui bisa cu tin bastante equipo cu ta den hopi mal condicion, unda cu tin algun cu ta den cay den otro.

“E waf tambe a mustra señalnan di hopi mal condicion”.

“Mi no sa unda nos ta bay haya e placa, pero e placa mester bin pa haci e inversionnan necesario”.

“Pues ta hopi importante pa nos keda cla cu nan y e trahadornan ta bezig tambe”.

“Siman pasa tabata tin un hopi bon noticia, despues e cos a cambia cu no tabata full completamente corecto y awe tin reunionnan andando”.

Esaki segun e Prome Minister, kende a sigui bisa cu spera cu via e negociacionnan cu Mediador di Gobierno lo por yega na un solucion pronto.

“E mihor cos cu por pasa pa Aruba ta pa CITGO bay, pa nos por busca un otro operador pa eynan”.

“Mientrastanto RDA, cu ta e compania estatal, a cuminza prepara pa e momento cu CITGO bay y tin diferente opcion”.

“Si CITGO bay por ehempel dia 31 di Januari, nos tin cu percura pa prome di Februari mesora nos tin un equipo eynan pa sigui cu e trabaonan, no di e refineria, pero si di e terminal”, segun e mandatario, kende a sigui bisa cu motibo ta cu na Februari ta sperando un otro barco cu lo bin cu gasolin, fuel y HFO, pues e trabaonan tin cu continua.

Esey ta pa garantiza e suministro.

E Prome Minister tambe un biaha mas a enfatiza cu e noticia cu gasolin lo caba na Aruba ta un noticia falso.

“Ora cu e relacion di trabao di e trahadornan cu CITGO finaliza, lamentablemente nan no ta bay tin trabou, pero nos compromiso ta pa pronto nos haya un operador nobo cu ta bay tuma nan over tambe, pa nan no keda mucho tempo sin trabou”.

“Algun di nan lo wordo tuma den servicio pa e compania aki pa por garantiza cu e trabaonan na e waf continua, ora cu e barco yega na Februari”, segun Wever Croes.

Fuente: Diario de Aruba