Diario de Aruba: Carta Koolman ta confirma necesidad investigacion (+Citgo)

Citgo tabata e formula milagroso pa a scapa gabinete Mike Eman di problemanan serio na momento cu no tabata posibel sigui goberna Aruba sin medidanan pisa na 2015. Den e cuadro aki mester mira con importante entrada di Citgo tabata pa e gobernantenan cu a bay negocia un acuerdo Biyonario cu Nicolas Maduro.
For di 2014 ya Merca bou Presidente Obama a tuma medidanan pisa contra e regimen Chavista di Venezuela pues na momento cu e negociacionnan tabata tuma luga gobierno di Aruba tabata sa cu mas medida por sigui.

Sinembargo na e momento e negociacionnan tabata di vital importancia pa gobierno Mike Eman, cu durante eleccion 2013 a haya un victoria aplastante pasobra pueblo no tabata na haltura di e realidad financiero di Aruba.

Citgo a bira un discusion politico pero na mes momento a wordo introduci na forma ilegal manera rapportnan oficial ta indica.

E parti mas importante tabata cu e aspectonan financiero a keda tras di cortina. Con importante e circulacion di placa tabata, ta sali dilanti den rapportnan cu DIARIO a uza como prueba manera e rapport di Raad van Advies cu a cuestiona pakico placa mester pasa di un punto pa otro.

Den e carta cu e director retira di Refineria di Aruba a manda awe pa DIARIO, porfin sumanan ta bini riba mesa.

Manera DIARIO semper a trece dilanti ta bon placa Citgo ta gana cu e mercado di combustibel na Aruba pues ta un bon negoshi gobierno Eman a entrada Nicolas Maduro cu no a cumpli ni por a cumpli cu e acuerdo di Citgo hipoteca pa tur e debenan cu Venezuela tabata tin.

Citgo mes tabata hundi den debe mescos cu PDVSA, cu los for di problema financiero ta den problema serio debi na acusacionnan criminal.

Citgo mes ta keda bou di investigacion di diferente pais pero tambe a base di un caso civil di e ex miembro di gerencia Marisol Gomes, cu a acusa entre otro difunto Nelson Martinez di tabata tin relacion cu mundo di narcotrafico cu mester a haya trato preferencial den Citgo.

Loke Marisol Gomes cu tabata prome cu Chavez a trece dilanti den Corte na Merca ta suficiente motibo pa autoridad local tambe cuminsa haci investigacionnan. Esaki mas ainda debi na e cantidad di casonan cu for di momento cu Aruba tabata negocia cu Citgo, tabata den Corte na Merca.

Ta trata aki di casonan criminal di labamento di placa, fraude y ladronicia serio cu tabata tuma luga den Citgo, cu tabata den situacion financiero sumamente malo ora Aruba tabata negocia e acuerdo.

DIARIO awor cu pueblo mes por tuma nota di e Miyones cu e acuerdo ta produci pa Citgo cu e mercado local di combustibel, ta sigui insisti pa investigacion debi na e ambiente criminal cu lo tabata presente den e top di Citgo durante negociacion y sumanan di placa cu a disparce ora a manda placa Aruba pa e proyecto.

Awe cu e carta di Koolman a confirma cu DIARIO a informa Aruba a base di berdad, DIARIO cu mas forsa ta exigi investigacion di negociacion te ultimo desaroyo den Citgo!

Fuente: Con información de Diario de Aruba