Diario de Aruba: Prioridad di Citgo ta pago di debe internacional

Mientras Aruba tabata celebra su carnaval 2019, desaroyonan importante a habri luna di Maart 2019, cu lo ta di importancia vital pa Citgo internacional cu oficina principal na Merca. Aruba ta busca pago pa continua cu e segundo fase di su proyecto refineria.
Na e oficinanan principal di Citgo na Merca, ta trata na haya placa pa paga e interes y parti di debe, segun contracto cu companianan di prestamo cu Citgo como borg cu regimen Maduro a haci.

Nicolas Maduro a uza Citgo como su baca di lechi. Na momento cu Presidente Interino Juan Guaidó a pone dirigentenan nobo na Citgo, el a tuma riba su mes pa paga tambe e debenan enorme cu te cu fin di 2018 Venezuela tabatin problema serio pa paga.

Na fin di 2018 tur indicacion tabata cu ta Rusia a bolbe yuda Maduro pone placa riba mesa pa haci e pagonan necesario pa evita cu inversionistanan internacional cu a yuda Venezuela cu placa cu Citgo como borg, lo a cristalisa nan borg y lo a reclama nan derecho riba parti di Citgo.

A adverti cu na Maart, pues e luna aki, Citgo mester tin un par di Biyon atrobe pa paga tanto e companianan aki como Rusia cu a adverti for di momento cu turbulencia a culmina na Venezuela na 2019, cu e kier su placa na Maart 2019.

Na luga di pago mas bien Rusia mester tuma nota di mas problema cu ta pone su placa na riesgo despues cu el a confronta e regimen di Maduro na November y a desaproba e maneho financiero di Maduro.

Na fin di siman pasa, e persona cu segun grupo Maduro ta Vice Presidente di Venezuela, a bay Moscu na momento cu Citgo tabata tuma pasonan legal pa los su mes for di PDVSA. Na mes momento PDVSA a cera su oficina na Lisboa, Portugal, pa evita cu medidanan Europeo lo ser aplica y a muda e oficina pa Rusia.

Citgo mester regla e pago na tur e companianan cu PDVSA a base di prestamonan mester paga na Maart si no kier pa borg tras di borg ser poni riba Citgo internacional dentro di poco.

Aruba ta envolvi den un situacion legal sumamente serio y cu un acuerdo cu no a regla loke ta pasa actualmente aunke tabata bisto cu e situacion lo por a surgi for di momento cu a firma e acuerdo Aruba y Citgo.

Presidente Juan Guaidó a bisa di su parti cu e lo sigura pago di e debenan y interes cu Citgo como borg e luna aki.

Siman pasa Prome Minister di Aruba, Evelyn Wever-Croes a bisa cu Aruba lo bay busca conseho legal na Merca. Esaki ta e paso mas importante pa Aruba na e momentonan aki y ta den cuadro di e pasonan cu DIARIO a yama urgente for di momento cu a bira bisto cu Citgo no por cumpli cu su acuerdo cu Aruba.

DIARIO a mustra riba e hecho cu e acuerdo cu Citgo ta haci Aruba parti di un escenario mundial peligroso.

E pais na e momentonan aki mester di expertonan internacional pa evita problema mucho mas serio.

Fuente:  Con información de Diario de Aruba