domingo, 10 de marzo de 2019

Aruba por bira centro distribuidor di Citgo

Den e situacion mundial nobo cu lo presenta na momento Nicolas Maduro retira su mes di presidencia di Venezuela, e chens pa e proyecto refineria Aruba ser ehecuta, lo perde urgencia pa Venezuela. E pais lo mester enfrenta un situacion den cual henter su economia lo mester ser poni riba pia. Central den esaki lo ta cu mester hinca hopi placa den refinerianan na Venezuela cu ta esencial pa e cambio social cu a priminti trahadonan di Venezuela bira realidad.

Informantenan clave di DIARIO a trece dilanti cu politiconan di Aruba tin e deber di prepara Aruba pa e realidad. Mester splica pueblo e berdad, pasobra ta masha dificil pa na e momento aki den un conflicto mundial, haya un solucion pa loke mester a spera na Aruba.

Aruba tabata sa pakico Maduro tabata kier refineria

Nicolas Maduro tabata tin un motibo cu e tabata kier a habri posibilidad pa Venezuela tin un refineria na Aruba. Gobierno di Aruba tabata bon na haltura di e situacion dificil cu Maduro tabata aden na momento cu el a firma e acuerdo pa Venezuela ya cu e tempo ainda e tabata haci y deshaci cu e compania.

Na momento cu a firma e acuerdo cu Maduro, gobierno anterior tabata sa cu Maduro no tabata mantene su propio refinerianan y tampoco tabatin placa pa inversionnan cu e mester a haci pa mantene y sigura continuacion di su contracto pa e refineria na Curaçao.

Maduro tabata yega na acuerdo cu paisnan rond Caribe pa entrega petroleo barata y warda petroleo na diferente isla pafo di Venezuela.

E motibo tabata e debenan cu Venezuela tabatin a base di gastonan grandi cu Maduro tabata crea a Venezuela pero tambe debenan cu e no por a paga na companianan cu nacionalisacion di petroleo na Venezuela a crea.

Maduro tabata tin acuerdonan pisa cu Cuba cu tabata haya petroleo pa asisti cu poder militar pa mantene regimen Maduro na mando. Rusia y China tabata demanda siguridad pa entrega di petroleo y vigilancia di nan interesnan den e situacion cu Maduro a crea y a causa medida di Merca.

Na momento cu Maduro a firma e acuerdo cu Aruba e no tabata tin placa pa mantene refinerianan na Venezuela cu no por a produci pa cumpli cu demanda di paisnan.

Guaidó cu prioridad hopi halto na Venezuela

Si Presidente Guaidó reemplasa Maduro na e puestonan administrativo cu Maduro ta mantene actualmente na Venezuela, su prome prioridad lo bira pa rehabilita tur e refinerianan na Venezuela, subi e produccion na Venezuela y asina sigura trabou y adelanto economico y social pa Venezuela.

Den e situacion cu Guaidó lo haya mando di Venezuela cu ayudo di tur gremio y sigur sindicatonan, ta dificil pa e bisa cu e prome entrada lo ta pa rehabilita e refineria di Aruba di cual e gasto total no ta conoci.

E segundo parti di e proyecto, manera na diferente ocasion a ser bisa, tabata destina pa dicidi cuanto placa e proyecto lo costa finalmente.

Esey ta haci cu e proyecto por tin necesidad di un inversion asina halto cu na e momentonan aki, den e situacion mundial cu a surgi, no ta haya compania pa realisa.

E refineria di Aruba no tabata den operacion y mester di placa pa pone refina azeta, pues produci y duna resultado directo na inversionistanan cu mester hinca placa tambe na Venezuela.

Mester sinta na mesa cu Citgo pa compromiso

Despues di un posibel cambio na Venezuela, Aruba lo mester sinta na mesa atrobe cu Citgo bou liderazgo di Guaidó cu siguransa total pa futuro.

Informantenan a ripiti loke nan a trece dilanti hopi bes, cu Aruba tabata sa cu e ta drenta un aventura na 2016 ora el a firma e contracto cu Maduro cu ya tabata den problema serio na Venezuela y cu mundo liber.

E presentacion di Camara di Comercio pa Aruba bira un centro pa warda productonan di Citgo y tambe distribui productonan di Citgo cu lo por keda riba mercado Arubano, ta loke ta factibel na e momentonan aki.

“E refineria di antes no ta presente mas. Loke tin actualmente mester di hopi placa pa drecha y na e momentonan aki Venezuela no por duna prioridad na Un Biyon casi pa Aruba”, expertonan a sigura DIARIO.

Nan ta considera cu ta di importancia pa den Parlamento di Aruba discuti e situacion nobo cu Aruba ta pasa aden y ki compromiso por ser alcansa na momento cu cambio mester presenta na Venezuela y e situacion stabilisa.

“Cambio mester bin. Di un banda of otro. Venezuela no por keda den e situacion actual y gremionan di Venezuela lo subi caya hunto cu Presidente Juan Guaidó y su aliadonan pa enfrenta Maduro y su grupo local y internacional,” expertonan a bisa DIARIO.

Nan a indica cu awe mundo politico mester mustra Aruba e realidad. Cada dia cu pasa ta un dia perdi pa Aruba manera nan a mustra.

Fuente: Con información de Diario de Aruba

No hay comentarios:

Publicar un comentario

Envíenos sus comentarios y aportes informativos al tema. Recuerde que su comentario, aunque no sea publicado, puede ser tomado en cuenta para nuestros temas de investigación. Los comentarios con términos insultantes, ofensivos, denigrantes y que incumplan nuestras políticas serán rechazados. Sólo puede enviar comentarios de menos de 1 mil (1.000) caracteres.

 
LO + LEÍDO...

LO + LEÍDO...