(Aruba) Huez a declara bancarota di InselAir y compania a stop di existi

Funda dia 8 di September 1993 door di Albert Kluyver, InselAir a bira un aerolinea cu durante su historia a sa di maneha y mantene un timetable di rutanan sumamente lucrativo pa e compania, principalmente den decada di 1990 y 2000.
El a bira tambe e aerolinea nacional di Curacao cu sede na Willemstad. Nan a cuminza cu un Embraer 110-P1 Bandeirante cu tabata sirbi ruta regional. Despues nan a cuminza bula mas ruta cu avionnan manera numeroso McDonnell Douglas MD-82, McDonnell Douglas MD-83, cu vuelonan na monton pa Miami, Charlotte, Medellin, Barquisimeto, Maracaibo, Caracas, Santo Domingo, Cuba, St. Maarten, Puerto Rico, Valencia, Quito, Belem (Brasil), Manaus (Brasil).

Nan a cuminza usa avionnan Fokker 50 como tambe Fokker 70, y tur esaki a pone nan aumenta frequencia di algun ruta regional.

E compania a pasa den hopi proceso, cu cambio di management, y tambe dado momento a haya un inyeccion di emergencia di Gobierno di Curacao, pa purba na mantene e compania na bida. Na aña 2007 a hasta haya e impresion cu e compania ta bayendo un direccion nobo.

Pero e tempo di gloria a cuminza cambia pa peor, desde aña 2016. Tur esaki debi cu Gobierno di Venezuela a stop di cambia Bolivar pa Dollars. E devisas aki tabata keda pega na Caracas, y e aerolinea a cuminza sufri. Mantenimento a cay atras y algun avion mester a stop di bula. Asina e acostumbrado chiste cu “InselAir tin delay” a cuminza circula den pueblo. Riba Plataforma di Aeropuerto di Aruba mes por a mira con na numeroso ocasion, mecaniconan tabata purba na fix e avionnan bieu, Fokker 50, pa nan por lanta vuelo bek.

Hopi hende tabata lamenta cu InselAir a inverti placa den avionnan di cual nan fabricanan ya a stop di existi, esta McDonnell Douglas y tambe Fokker. Pesey e dolornan di cabez na monton cu avionnan hopi bieu tabata sigui presenta su mes.

E crisis financiero aki a keda persisti pa 3 aña, y cu varios grupo a bin dilanti den nan intento pa rescata e compania. Hasta a menciona aki cu Avianca di Colombia tabatin interes. Sinembargo un di e ultimo gruponan cu tabata mustra interes, a hala atras na ultimo momento. Esey a pone cu cu Diamars 26 di Februari 2019 den oranan di mainta, Huez na Willemstad a declara InselAir den bancarota. Corte a purba tur momento di tene e aerolinea na bida, pero e biaha aki no tabatin speranza mas.

Desde ayera, 100 persona a perde trabao, y Gobierno a perde e 50 miyon Florin cu nan a inyecta di emergencia den e compania.

El a nifica un fin na un epoca di gloria, pero tambe fin na hopi sufrimento di pasaheronan cu a keda pega na numeroso ocasion.

InselAir mes a stop di bula desde Diasabra dos siman pasa caba.

ESNAN CU PASASHI:

Awor cu el a wordo declara bancarota, e compania a manda nan ultimo mensahe, mustrando cu pasaheronan cu pasashi pa Vuelo 2511 y Vuelo 2513 di Curacao pa St. Maarten, of Vuelonan 2512 y Vuelo 2514 di St. Maarten pa Curacao y opera pa Divi Divi y Corendon Dutch Airlines, pa contact Divi Divi pa status di vuelo.

Divi Divi a bisa cu nan lo honra tur pasashi di InselAir por lo menos te Diahuebs 28 di Februari 2019. Esaki ta solamente pa pasashinan di CUR-SXM-CUR y vice versa. Esaki no ta conta pa otro rutanan.

Pasaheronan cu tin pasashi pa St. Maarten riba un fecha despues di esey, lo wordo notifica pronto relaciona cu e validez di nan pasashi.

Pasaheronan afecta pa vuelonan cu lo no lanta mas, tin di percura pa tin tur informacion aki pa comunica, esta e nomber di pasahero, e PNR-Record Locator (5 pa 6 number y letter), bo number di pasashi InselAir (number di 13 cifra cu ta start cu “958”), bo vuelonan planea, unda bo a cumpra bo pasashi y cuanto bo a paga pa nan. Tambe bisa nan cuanto tax y fees bo a paga.

Si bo a cumpra bo pasashi via un Agencia di Viahe, e ora bo tin di contact bo agente pa haya placa bek of check opcionnan di rebook.

Si bo a cumpra un pasashi cu credit card online na fly-inselair.com, of na un di nan oficinanan, e ora bo mester contact e Banco di bo Credit Card pa disputa bo cobranzanan como “non-delivered”.

Empleadonan di Aerolinea cu ta viaha riba pasashi di standby, e ora bo mester start un proceso di refund via myIDTravel.

Si bo a cumpra bo pasashi pagando cash na un di nan Ticket Office, e ora bo mester manda un refund-claim cu e compania encarga cu e caso di bancarota aki di InselAir:
Mr. R. van den Heuvel,
VanEps Kunneman VanDoorne and Associates,
Julianaplein 22,

Willemstad, Curacao.

Tuma nota cu contacto normal awor via email of telefon cu InselAir no ta disponible mas.

VUELONAN AWOR:

Si bo kier bula pa Curacao of Bonaire, pa aworaki bo opcion ta keda cu Aruba Airlines, Divi Divi Air, como tambe Win Air, y EZ Air di Bonaire.

Fuente: Con información de Diario de Aruba