Diario de Aruba: Compania Mericano prepara pa bende CITGO

Cu e alarma grandi cu DIARIO a bati pa e aventura di CITGO no tabata sin base, ta haya su confirmacion durante e ultimo parti di 2018. Na porta di un aña nobo y den un guera friu cu Venezuela a provoca, informacionnan a drenta cu Crystallex lo sigui cu su plannan pa bende CITGO of parti di CITGO mientras mas compania Mericano ta prepara pa pone man riba e parti di CITGO cu ainda no ta den man di Rusia. Pa Rusia benta di CITGO lo ta un desaster debi na e balor di alrededor 8 Biyon Dollar cu CITGO.

Cu nunca Aruba mester a firma un contracto cu CITGO, e baca di lechi di Venezuela dirigi pa un Gobierno cu a destrui Venezuela, a bolbe wordo demostra ayera ora publicacionnan riba CITGO a cuminsa mira luz.

Den e ambiente di guera friu entre Merca y Rusia y debi na e hecho cu Venezuela ainda no por cumpli cu companianan cu e debe, ayera a bira conoci cu Crystallex y mas compania Mericano ta busca forma pa uza CITGO pa haya nan placa.

Crystallex lo tabata ocupa cu e gestion legal pa pone e compania of parti di e compania na benta despues cu atrobe Venezuela no a cumpli cu areglo di pago di luna pasa.

Un abogado di Crystallex a mustra cu Venezuela a kibra e palabracion cu el a haci cu Crystallex luna pasa y cu awor pasonan ta ser tuma pa ehecuta e decision di Hues na Merca y bende CITGO of en todo caso parti di CITCO pa Crystallex por haya e placa cu Venezuela no a paga.

Esaki no ta nifica cu parti di CITGO lo keda liber debi na e hecho cu tin mas compania cu ta tuma pasonan legal contra Venezuela.

E exito cu companianan cu a logra haya nan debe paga despues cu nan a pone embargo riba propiedad di Venezuela, cu hasta a cambia su rutina di transporta y warda petroleo, ta mustra riba determinacion di comerciantenan internacional cu no tin tolerancia mas cu Venezuela cu a crea un guera friu basa riba e debe cu e tin na Rusia.

E hecho cu e actuacion di Venezuela a ser yama “free for all” ta ser fortalece awe.

Rusia y Merca a uni den intentonan militar pero den tambe ehercicio pa Rusia trata di subi produccion Venezolano pa asina saca sumanan astronomico cu el a hinca den Venezuela.

Mientras Crystallex tin derecho di uza CITGO como borg, Rusia ni Venezuela por trece cambio den e lista di propietarionan di CITGO.

Venezuela te awor a trata di keda cu CITGO cu ta crucial pa regimen Maduro tin entrada. E hecho cu na cada momento cu Venezuela tabata a punto di perde CITGO, Rusia tabata presente na Venezuela, a duna mundo e indicacion grandi cu ta Rusia ta yuda Venezuela paga CITGO, den cual Rusia tin casi mita di e accionnan den su man.

Di parti di PDVSA a ser bisa cu e pasonan cu el a tuma Dialuna contra decision di Hues, no ta nifica cu el a kibra un palabracion.

DIARIO ta sigui tur desaroyo internacional di acerca pa asina e pueblo di Aruba cu Venezuela a tene pendiente cu e proyecto na Aruba, por ta bon informa.

Fuente: https://www.diario.aw