(Aruba) Awor Asdrúbal Chávez lo maneha Citgo for di Aruba

Citgo Petroleum, cu ta e compania di refinacion di PDVSA na Merca, a confirma e siman aki cu Gobierno di Donald Trump a revoca e visa na e presidente di e compania, Asdrúbal Chávez, kende ta primo di e fayecido mandatario Hugo Chávez. Asdrúbal Sanchez, kende tabata Ministro di Petroleo y Mineria di 2014 pa 2015, lo sigui cu su trabao y e medida di Merca lo no afecta ni e conformacion di e linea ehecutivo di e empresa ni su operacionnan diario.

Ni Gobierno di Merca ni e negoshi a duna detaye riba e motibonan di e revocatorio di nan visa. Sinembargo, e corant Houston Chronicle a indica cu US State Department a revoca e visa di Chavez pa un investigacion riba corupcion na PDVSA y el a haya 30 dia di tempo pa sali di Merca.

No ta mucho claro unda Asdrúbal Chávez lo bay traha, como cu e tabatin custumber di traha na e ‘headquarters’ di Citgo na Houston, Texas.

Pero pa Bloomberg Business News, un di e posibilidadnan lo ta cu e lo bay muda y biba na Aruba, unda Citgo ta tratando di renoba e refineria di Aruba.

Citgo Aruba a haye ta retrasa e proyecto di renobacion di refineria na San Nicolas debi na e sancionnan di Gobierno di Washington contra PDVSA, cu no ta permiti nan obtene financiamento adicional pa e proyecto na Aruba.

Na Merca, Citgo ta dunando empleo na 4.000 persona, di cual mas di 800 ta na Houston. Tin como 5.500 Gasoline Service Station na Merca cu ta bende bao di e marca di Citgo, cu ta opera tres refineria di petroleo na Corpus Christi, Lake Charles (Louisiana), y Lemont (Illinois). E refineria di San Nicolas na Aruba ta e unico instalacion cu Citgo ta operando pafo di Merca.

Corupcion na CITGO y PDVSA:

Citgo a bin ta enfrenta un incertidumbre desde November 2017, ora cu nan presidente interino y cinco otro ehecutivo halto a worde aresta na Venezuela y acusa pa corupcion. President Nicolas Maduro a designa Asdrúbal Chávez un poco despues como Presidente Ehecutivo di Citgo.

Na Januari, e Fiscal designa Tarek Saab, a ordena aresto di Rafael Ramirez, ex-Hefe di PDVSA, bao sospecho di labamento di placa y malversacion di fondonan. Ramirez aworaki ta scondi pafo di Venezuela.

Algun siman mas despues, Justice Department di Merca a anuncia e acusacion formal di cinco ex-funcionario di Gobierno Venezolano pa nan supuesto participacion den un plan internacional di labamento di placa cu a involucra sobornonan pa obtene contract di energia cu PDVSA. Justice Department a denuncia cu e funcionarionan a conspira pa solicita sobornonan na e suministradornan di PDVSA y despues a laba e ganashinan via di un serie complica di transaccion financiero, di cual hopi a wordo pasa via e sistema financiero di Merca.

Fuente: https://www.diario.aw