(Aruba) Prome Minister: Reunion lo tuma lugar na Corsow dia 3 di Mei pa trata situacion di Venezuela

Durante conferencia di prensa, Prome Minister Evelyn Wever-Croes a indica cu un reunion lo tuma lugar na Corsow dia 3 di Mei pa trata situacion di Venezuela, na unda e prome reunion di comision despues di firma di e MoU door di Minister di Relacionnan Exterior di Hulanda, a keda palabra cu comisionnan lo bin hunto pa palabra riba rekisitonan cu Aruba ta bay pidi prome cu habri frontera pa productonan wordo importa. E frontera no ta habri ainda, pendiente di e reunion aki.

E comision tabata cla pa e reunion aki dos siman pasa, sinembargo Venezuela no tabata cla, segun Prome Minister, y awo a wordo indica cu e reunion aki lo tuma lugar dia 3 di Mei. El a agrega cu su departamentonan a haci e sondeo y nan tin nan maneho cla pa discuti esaki na Corsow.

– Fiesta di Mocion-

Prome Minister a duna un comentario pa loke ta trata un post riba Facebook relaciona cu ‘fiesta di mocion’. El a indica cu ora ta weita 85 mocion cu tabatin y sinti locual cada parlamentario a trece dilanti, e no ta refleha riba su gobierno y nan programa di gobernacion.

E ta refleha riba mal maneho cu tabatin durante ultimo 8 aña! Corda cu si fraccion di AVP tabatin tanto mocion pa trece padilanti y nan no a tribi di haci esaki den 8 aña, esaki ta demostra con e gobernacion tabata tuma lugar. Pasobra fraccionnan di coalicion a bin cu puntonan pa dilanti di cosnan cu nunca a wordo regla y nan kier pa nan wordo regla aworaki.

E ta considera esaki como un señal cu nos no tin ‘stempel parlament’. Parlamento ta parlamento y nan trabao ta pa controla gobierno, y unico caminda cu nan por guia gobierno y expresa nan deseonan na gobierno ta atravez di mocion of amienda of ley iniciativa.

– No tin crisis den coalicion-

Prome Minister a enfatiza cu no tin un crisis den coalicion pasobra no a aproba mocion presenta pa parlamentario Ricardo Croes di RED, relaciona cu cannabis medicinal. El a bisa cu e parlamentario a presenta y defende su mocion. E coalicion aki ta solido y awo cu presupuesto a pasa y cu nan tin e vision y fondonan pa sigui bay padilanti, ta mas fuerte nan ta bay bira, segun Minister Wever-Croes.

Loke si el a enfatiza ta cu e mocion ta pidi gobierno pa acelera e proceso pa yega na legalizacion di uso medicinal di cannabis manera tabata palabra den programa di gobernacion. Desde cu nan a drenta gobierno, nan a institui un comision cu ta trahando pa legaliza uso medicinal di cannabis. E comision ta cay bao di su Ministerio y mirando cu tin diferente ministerio envolvi den esaki.

E comision ta haciendo hopi trabao caba, y ta enfocando nan esfuerzo den dos area, e parti di salubridad pa trata e aspecto medicinal, manera productonan deriva di cannabis cu lo ta na remarca pa wordo considera como remedi; y di parti di ministerio di husticia, cu ta trahando riba cuadro legal y nan ta studiando ehempel den otro paisnan, pa asina Aruba tambe por implementa esaki.

Den mesun momento, nan tambe ta studiando esaki cu Ministerio di Asuntonan Economico y Sector Primario pa si e cultivo por trece un desaroyo economico pa Aruba.

Fuente: https://www.diario.aw