Riba Diahuebs Nicolas Maduro a stop tur vuelo entre Aruba y Venezuela

Riba Diahuebs 8 di Maart, Aviacion Civil a actua riba un decision nobo di Presidente Nicolas Maduro di Venezuela, pa awor si cera hermeticamente e frontera di e pais cu Aruba, Bonaire, y Curacao. Como cu algun vuelo charter tabata sigui wordo haci entre Venezuela cu islanan ABC, e biaha aki a bay mas leu. Ningun vuelo mas por tuma lugar entre e paisnan aki, y alavez, ningun hende cu paspoort Hulandes por drenta Venezuela.

Tur vuelo comercial, como tambe lancha y barco no por move entre Venezuela y islanan ABC, ni pa transito. Esaki ta prohibi te cu proximo aviso.

E ta afecta hasta vuelonan priva, y lo nifica tambe cu hasta Aruba Airlines lo stop mesora di bula pa Venezuela.

E ta prome biaha tambe cu e medidanan introduci dia 6 di Januari 2018 door di President Maduro a escala di e forma aki. Pasobra te cu e siman aki, tabata permiti vuelo di esnan cu ta djis haci transito, of cu tabata traslada personanan di nacionalidad Hulandes.

Pero desde Diahuebs 8 di Maart, a implementa un blokeo total entre Venezuela y islanan ABC.

E asina yama “NOTAM”, cu a wordo manda pa tur aerolinea cu ta haci servicio di transito entre Venezuela y islanan ABC, ta mustra cu e medida ta extende te cu proximo aviso.

E ta inclui tambe vuelonan cu tin di haber cu carga y transporte di post. DIARIO ta na altura cu varios compania di Courrier, y hasta un compania di carga aereo, sa bula pa Venezuela despues di a ateriza na Aruba prome. Pero awor esey no por mas.

Pulse imagen para ampliar

E decision nobo aki a pone cu hopi persona cu ta viahando di Miami pa Venezuela cu Aruba Airlines via di Oranjestad, a keda pega na Florida.

Pa Aruba Airlines, e vuelo di Venezuela-Aruba-Miami ta uno hopi lucrativo, y e medida aki ta uno cu ta afecta nan substancialmente. Claro cu den cierto sentido, e ta afecta e compania cu tin su sede na Aruba.

E aerolinea Albatros tambe tabata haci algun vuelo di charter entre Aruba y Venezuela, y esey tambe a wordo para inmediatamente. Tin pasahero cu ya caba a yama e aerolinea pa haya placa bek. Nan a haya contesta cu e pasashi ta keda valido, y nan por use bek ora cu e medida wordo elimina den futuro.

Si bo kier viaha awor pa Venezuela, kizas bo mester bay via di Panama of via di Colombia. Pero algun hende a spanta pa haya sa cu e prijs di pasashi ta entre 1.000 y 1.600 Florin.

E medida aki ta afecta tur esnan cu tin pasashi ya caba cumpra pa bishita Punto Fijo den dia- of simannan venidero pa checkup medico. Ta bisto cu e viahenan aki lo no por sigui. Solamente si bo busca pasashi cu otro aerolinea cu ta pasa via otro pais.

Di otro banda, e ta dificulta e proceso di autoridadnan na Aruba cu de vez en cuando tin di deporta algun ilegal bek pa nan pais. Awor cu no tin vuelo, ni barco Venezolano mas, e ta bira un dolor di cabez pa autoridad hudicial di Aruba.

Semana Santa ta casi yega tambe, y esey nifica cu e influx di pasaheronan Venezolano lo keda afecta pa Aruba. Hopi Venezolano cu tin e poder economico, tabata sigui bishita Aruba pa Pasco Grandi. Esaki lo ta un problema pa 2018.

Y loke tin hopi hende riba e isla aki ta grawata nan cabez ta, di con Venezuela a implementa un blokeo cu islanan ABC, pero tog a manda pa Aruba un Consul nobo di Venezuela?

Fuente: https://www.diario.aw