(Aruba) Parlamentario Alan Howell: Pueblo merece pa sa e berdad (+Citgo)

Parlamentario di POR, Alan Howell a elabora riba e tema di Citgo mirando cu tempo ta pasando y Parlamento no ta hayando e informacion necesario pa sa kico ta pasando eynan. Como fraccion, a haci nan investigacion, pero kier a tambe for di banda di gobierno kico ta bebe y come riba loke ta pasando den Citgo.
Por a mira cu algun siman atras gerencia di Citgo a anuncia cu nan lo bay den un proceso di slowdown, pero ya caba tur hende tabata sa cu e ta riba slowdown. Pesey un di e preguntanan cardinal ta con mas ta bay slowdown y kico nan ta considera slowdown.

Por a ripara tambe cu varios persona emplea atraves di contratista a perde trabou, algo cu sigur no ta nada alentador pa e famianan na Aruba.

Tambe fraccion di POR ta na altura cu tin cierto fenomeno ta pasando cu por wordo considera hasta dictatorial unda cu nos Arubianonan no tin mucho di bisa, mester wanta tur sorto di cos chambon, sigui traha y keda keto.

E siman aki Prome Minister lo ta den Parlamento pa contesta tur e preguntanan cu tin relaciona cu e tema. Howell ta spera cu Pemier bin cu tur e personanan concerni pa por contesta e diferente preguntanan cu no solamente fraccion di POR, pero henter Aruba kier contesta riba nan.

E ta indica cu no por ta asina cu mester sigui keda den scuridad y tende riba cierto movecionnan, maniobranan cu Citgo ta bin ta haci y na final di dia lo por bin tende cu Citgo no lo habri at all.

Fraccion di POR  a manda un serie di preguntanan skirbi pa Premier Wever-Croes, pero dia di e reunion cu lo ta diahuebs proximo, lo bay tin un cantidad adicional di pregunta cu lo wordo haci verbalmente na Prome Minister y su team.

Algun di e preguntanan skirbi ta:

1. Citgo a anuncia un slowdown. Kico nan ta considera un slowdown?
2. Cuanto contratista local ta paden ainda y cual ta e expectativanan pa nan?
3. Cual ta e motibonan principal pa e slowdown y pa ki tempo nan ta premira un aumento den e velocidad?
4. Cuanto persona a perde nan trabou (suma exacto)?
5. Empleadonan di Citgo ta core e riesgo di perde nan trabou? Si ta no, con sigur esaki ta? Y si ta si, pa ki tempo?
6. Kico gobierno a haci pa esnan cu a perde nan trabou inesperadamente?

Parlamentario di POR ta indica tambe cu awe por compronde e motibonan pa cual su colega Marisol Lopez-Tromp a bay contra di e proyecto aki y tambe e pakico Minister Otmar Oduber no tabatin confiansa den dje tampoco, cual ta entre otro debi na negociacionnan dudoso cu personanan den exterior.

Igualmente el a menciona cu e tempo ey Aruba y San Nicolas en especial tabatin otro oportunidad, un hotel, pero gobernacion a laga e hotel aki cay pasobra e refineria lo a trece mas entrada pa Aruba. E hotel lo a trece un cambio den e parti economico pa San Nicolas, e lo trece un cambio den e color di San Nicolas y lo a trece turismo y un crecemento positivo pa San Nicolas.

Lastimamente awe nos por mira cu e proyecto bunita di hotel no a sigui y un refineria te cu awe no ta produciendo nada pa Aruba muy en especial pa San Nicolas y e perspectivanan ta dudoso, Alan Howell a finalisa.

Fuente: http://earubianonews.com