jueves, 28 de diciembre de 2017

(Aruba) Financiamiento di Citgo Aruba ta paralisa

Desde algun siman caba, specialmente na momento di detencion di e top di CITGO Petroleum na Venezuela y despues ora a detene e top di PDVSA tambe, tur asunto relaciona cu e rehabilitacion di CITGO Aruba Refining NV ta paralisa. Un ke otro tin di haber cu e financiamento di e proyecto, cu de facto ta cla, pero e fiado a pone condicionnan nobo, specialmente si tene cuenta cu e ultimo desaroyonan den e compania.

E hechonan ta mustra claramente cu tin un guera di poder tumando luga na Venezuela, riba ken tin maneho di PDVSA den su mannan. Fuentenan yega na e asunto ta sigura cu ta trata aki di podernan militar cu ta esunnan sosteniendo maneho di Gobierno di Presidente Nicolas Maduro di Venezuela. Esey ta splica su mes dicon a yena e puestonan clave na CITGO y na PDVSA cu militarnan di rango halto.

Aki na Aruba tin yen di hende canando masha preocupa y hasta spanta pa e consecuencia cu e cambionan por tin pa cu e proyecto. No necesariamente lo para e proyecto, pasobra e refineria di Aruba ta escencial den e plannan di PDVSA y di CITGO, pero si lo por spera cambio den e ehecutivonan na cabes di e proyecto y e companianan scogi pa conduci e trabounan di rehabilitacion.

Un di e cambionan cu ta scuchando den pasiyonan na CITGO Aruba Refining NV ta relaciona cu e consorcio di contratistanan cu CITGO a scoge pa e proyecto na Aruba, esta Y&V di Venezuela y Technip di Francia. No ta sigur cu nan mes lo efectua e trabounan, cu ta core den miyones di dollar, pero cu ta conta cu financiamento stranhero.

Top di partido MEP a bishita ehecutivonan di CITGO Aruba Refining NV den pleno campaña. Awe e ex Gerente General di CITGO Aruba, Alirio Zambrano, riba e foto adhunto, tambe ta encarcela!

E compania cu lo financia PDV, cu ta e doño di CITGO Aruba Refining NV, lo ta Agostar Group di Argentina pero cu desde recien ta situa na Inglatera. Nan tin un amplio experencia den e industria petrolero y di gas natural.

Bisando esey, ta pone cu e consorcio scogi ta na peliger, aunke cu legalmente e acuerdo cu CITGO Aruba Refining NV ta bisa textualmente cu e acuerdo ta “subject to financing”, lagando e porta habri cu e financiado por tin un otro opinion cu e refineria.

Segun nos informacionnan, CITGO Petroleum y PDVSA a purba tur forma pa desvia for di e condicion pa e fiansa, pero sin mucho exito. Mester tene cuenta cu e maneho di e Gobierno di Donald Trump prohibiendo companianan Mericano pa haci negoshi of ofrece fiansa na companianan Venezolano, ta haci e opcionnan pa fiansa mas limita.

Fuentenan den e refineria a sigura cu Y&V y Technip ya a cuminsa baha e cantidad di trahadonan na Aruba, sperando e decision final di Agostar y CITGO Aruba Refining NV. De facto, nan no a cuminsa tuma mucho trahado local ainda, sino mas bien na nivel di ingenieronan y expertonan, mayoria stranhero y di nan mesun compania, pa haci trabou di investigacion y preparacion. Pero si acaso e financiado opta pa bin cu nan mesun compania di construccion, lo haci cu mester start for di 0 atrobe, cu tur consecuencia pa cu mas tardansa pa reanudacion di e refineria, cu ya caba ta coriendo cu atraso.


Dia 7 di october 2016, Gobierno di Aruba a firma un acuerdo di “lease” cu CITGO Petroleum pa opera nos refineria cu den su bon tempo ta refina 235 mil bari di peteoleo pa dia, pa un periodo di 15 aña y cu opcion pa prolonga cu 10 aña mas pa un total di 25 aña, via nos compania estatal RdA NV. E refineria, cu tabata cera desde aña 2012 lo mester conta cu un inversion di mas o menos 700 miyon dollar Mericano y cu den un periodo di 18 luna di rehabilitacion, e lo ta cla pa refina 209 mil bari pa dia di e crudo pisa di Venezuela den un producto sintetico cu ainda lo mester pasa dor di un proceso di refinacion pe bira un producto final pa benta.

A funda e compania Agostar Group Limited na Juni 2016 na Inglatera y na Juni 2017 a bira un compania publico, Agostar Group PLC, balora na 1 biyon pound Ingles. E directornan y gerencia tin experencia internacional den proyectonan na Venezuela, Sur America, China, Africa y den Caribe. Nan ta specialisa den proyectonan cu ta encera financiamento di proyectonan di petroleo y gas. Nan oficina principal ta situa na London, Inglatera. Un di nan proyectonan mas grandi ta construccion di un pipa di petroleo y gas na Venezuela.

Funda desde aña 1958, Technip France ta un di e entidadnan principal di Technip Group, cu mas di 2800 empleado y cu oficinanan na Paris, Lyon y Vaulx-en-Velin, ofreciendo servicionan riba tera y riba lama. Nan tin hopi experticio specialmente den “deep water offshore platforms”, den licuifica gas natural y “ethylene”.

Y&V Group ta funda na 1985 como fusion di e compania di ingeneria Yanes & Asociados y e compania di construccion DRV, ambos existente desde añanan 60 caba. Hunto a crea Y&V, un compania di construccion cu oficinanan na Canada, Colombia, Mexico, Merca, Europa y Venezuela, cu ta ofrece su clientenan servicio di ingeneria completo, construccion y realisacion di proyectonan grandi. Cu mas di 1500 empleado bon cualifica, nan ta ofrece experticio den “project management” na companianan rond mundo, specialmente den area di energia, petrokimico, petroleo, gas y di infrastructura. Nan lema ta “Orguyoso di construi e futuro, tur dia”.

CITGO Aruba Refining N.V. ta un compania netamente Arubiano, den un grupo di companianan di operacion cu ta resorta bou di PDV Holding Inc, cu ta un doño indirecto di CITGO Petroleum Corporation y ta un subsidiario di Petroleos de Venezuela S.A. (PDVSA), e compania nacional di petroleo di Republica Bolivariana di Venezuela.

CITGO Aruba Refining N.V. ta e operador di e refineria na Aruba, situa na San Nicolas y cu ta pertenece na Refineria di Aruba N.V. (RdA), un compania cu ta pertenece 100% di Gobierno di Aruba. (PULSE AQUÍ PARA VER MÁS)

Fuente: Con información de http://24ora.com

No hay comentarios:

Publicar un comentario

Envíenos sus comentarios y aportes informativos al tema. Recuerde que su comentario, aunque no sea publicado, puede ser tomado en cuenta para nuestros temas de investigación. Los comentarios con términos insultantes, ofensivos, denigrantes y que incumplan nuestras políticas serán rechazados. Sólo puede enviar comentarios de menos de 1 mil (1.000) caracteres.

LEA...

 
LO + LEÍDO...

LO + LEÍDO...