(Aruba) Grupo di tramitador ta falsifica firma di minister pa haya permiso ilicitamente

Tin cierto iregularidad ta tumando luga cu hendenan eyfo cu ta engaña hende cu asunto di permiso. Prensa a puntra minister Benny Sevinger si e ta na altura, cual el a splica cu a haya hopi keho for di diferente persona cu a acerca cu documentonan y a puntra su persona cu e conoce e permisonan aki.

Ora cu a haci un revision riba nan, a ripara cu ta permisonan falso cu ta worde duna den nomber di e minister.

Como 3 pa 4 persona a bay den e ultimo dianan cu esaki y a bay Dimas pa haci pregunta riba e permisonan ey. Por a mira cu permiso ta worde pidi 25 di October, y increible cu dia 26 di October ya el a haya permiso caba cu firma, “supuestamente” di e minister.

Mayoria di e permisonan aki, e minister ta ripara cu tin un nomber di GP Multiservice. E minister a caba di reuni cu Minister Dowers over di e caso aki of awe caba e denuncia a worde haci na instancianan di husticia pa haci un investigacion riba e falsificacion aki cu ta conduci na estafa hende. Den e ultimo lunanan a haya hopi hende cu ta bisa cu ta pagando pa permisonan cu sumanan astronomico di 8 mil.

E minister ta bisa cu un tramitador, si ta un persona serio, no por ta cobra e suma ey di placa sin cu e ta deliver, sin cu e ta haci algo pa e servicio cu e ta duna, mucho menos na e sumanan grandi asina ey. Ta splica diferente biaha, ningun hende mester di un tramitador pa e por procesa un permiso.

Doño di trabao por procesa e permiso, sin ningun motibo pa tin un tramitador pa esaki. Sin embargo tin hende kier haci uzo di servicio di tramitador ta nan derecho. Tin hopi hende ta yama nan mes tramitador, cu e hecho cu sali y priminti tur sorto di servicio y tambe nan permiso, cual no por cumpli cu ne y cual no lo haya si nan no ta cumpli cu e reglanan y ley. Hopi biaha ta trece esaki dilanti y e minister e menciona pa tene cuido ora di tramita permiso pasobra hendenan ta estafando.

Fuente: http://www.diario.aw