jueves, 3 de noviembre de 2016

(Aruba) Alerta pa posible estafa andando

Tin un grupo di hende ta canando cas pa cas, den e caso aki buscando specificamente ciudadanonan di Venezuela, bisando nan cu Gobierno ta bay duna un amnistia specificamente pa personanan di nacionalidad Venezolano pa motibo di e situacion na Venezuela y pa motibo di Valero.

Esaki no ta cuadra cu berdad. Gobierno no ta bay duna ningun amnistia na ningun grupo, y tampoco tin esaki den pipeline. Dia cu a duna amnistia tabata na aña 2010 y tabata basa riba e ley cu a worde introduci door di minister anterior, cu a papia riba e modelo Suizo cu hende tabata haya 3 aña y despues di 3 aña e mester a sali.

Consecuentemente tabata tin miles di hende indocumenta na e momento cu a drenta den Gobierno, pero ta hendenan cu tabata tin permiso caba of a haci intento pa haya permiso y tabata mas di 5 aña bibando na Aruba, cu permiso cu a worde rechasa na final di Gobierno anterior na 2009 y pa e personanan ey a duna amnistia e tempo ey. E motibo ey no ta existi mas. No tin un motibo pa duna un amnistia na e momentonan aki pasobra cu por haya bo permiso si bo ta cumpli cu tur e reglanan manera cu ley ta stipula.

Consecuentemente no tin ningun motibo pa duna un amnistia na e momentonan aki. Simplemente si ta cumpli cu e reglanan, doño di trabao ta firma pabo, ta bay labor, labor, si no tin Arubiano pa e trabao, ta duna un conseho positivo y e resto di documentonan ta entrega na Dimas y si cumpli cu tur esakinan, ta haya e permiso normal manera e proceso tin cu cana.

No tin ningun motibo pa esey. Ta mira awo cu hendenan kier haci uzo di personanan cu ta priminti tur sorto di cos y nan ta worde estafa door di esaki. Kier a manda un voz di alerta pasobra ta mira cu e ta birando algo grave cu hopi hende ta worde estafa sin cu nan ta haya un solucion pa e problema cu nan tin na e momentonan ey.

Segun Minister Sevinger, gobierno a haya diferente persona cu a bin cu e permiso den nan man y nan ta bisa cu nan a paga 750 pa e permiso ey y nan ta bin puntra si e permiso ta valido. Ya nan a worde estafa caba. Na e momento ey nan tin cu haci un denuncia na polis y hopi biaha e denuncia ey no ta sosode pasobra nan tin miedo pasobra cu nan ta ilegal, nan tin miedo di haci e denuncia ey.

Di parti di e minister, ta haci e denuncia awe na minister di Husticia, pa Ministerio Publico y husticia haci un investigacion, pasobra no solamente e personanan aki a worde estafa, pero ta falsificacion di un vergunning di ministerio di Sevinger cu su firma, door di gruponan cu awo investigacion ta bay mustra ken e hendenan aki ta.

Den e investigacion cu ta bay cuminsa awor aki, polis y Recherche lo trece dilanti claridad ken e personanan aki ta y ki castigo nan lo haya, pasobra e minister a haci un denuncia oficial na e personanan cu ta haci tipo di estafanan aki. Aparentemente ta papiando di masha hopi mes. No tin’e cuantifica ainda. Mas e notifica aki sali, mas hende lo bin dilanti y lo haya sa ta ki enbergadura esaki ta. Ta algo hopi grave cu hende ta worde estafa y mas ainda cu Departamento di gobierno, ministerio den e caso aki di infrastructura y integracion, permisonan ta worde falsifica y minister su firma ta worde falsifica sin cu ta un firma di minister.

E minister ta spera cu husticia por yega na nan, pasobra cu ta supone door cu asina hopi hende a worde estafa cu e personanan aki tambe lo bin dilanti cu ta tal persona a estafa y e ora ey husticia lo cana su caminda pa e hendenan aki haya nan castigo.

Fuente: http://www.diario.aw

No hay comentarios:

Publicar un comentario

Envíenos sus comentarios y aportes informativos al tema. Recuerde que su comentario, aunque no sea publicado, puede ser tomado en cuenta para nuestros temas de investigación. Los comentarios con términos insultantes, ofensivos, denigrantes y que incumplan nuestras políticas serán rechazados. Sólo puede enviar comentarios de menos de 1 mil (1.000) caracteres.

LEA...

 
LO + LEÍDO...

LO + LEÍDO...