(Aruba) Parlamentario Glenbert Croes convenci den reapertura di refineria hunto cu PDVSA

Mi ta kere cu nos tan a un momento culminante unda cu mi ta kere tambe cu Gobierno di su banda ta den e fase final pa crusa e brug pa loke ta e relacion cu PDVSA,” esaki ta loke e miembro di fraccion di MEP den Parlamento Glenbert Croes a trece dilanti den un declaracion duna na prensa.

E Parlamentario a bisa cu nan a tuma diferente accion pa mustra Gobierno cu mester duna e refineria un chens di un reapertura. Den cuadro di esaki, el a biaha varios bes pa Venezuela y awor ta asina leu cu e compania petrolero estatal ta expresa su interes den e refineria. E resultado final, segun Croes, ta cu PDVSA mester convence e sector politico di Venezuela y mas cu tur e Presidente Nicolas Maduro.

Den cuadro di e ariba menciona, el a realisa un otro biahe recientemente pa Venezuela unda cu el a combersa cu diferente persona di Asamblea Nacional, for di e Presidente bin abou, y a combersa cu Vice Canciyer pa Europa pa pidi e chens pa convence Maduro di e importancia nacional di e refineria.

“Nos kier pa nan tende e grito di e pueblo Arubiano cu nos kier habri nos refineria bek, e por nifica un recuperacion economico di 15% di e GDP y lo crea cupo di trabou bon paga … Ademas di ta un pilar economico cu semper a trece progreso pa Aruba, nos mester di un diversificacion economico pa no keda depende di turismo. Pesey nos ta keda insisti, y mi ta kere cu nos cerca cerca di logra reapertura di e refineria cu PDVSA.”

\Con ta finalisa e procedura aki, e Parlamentario ta haya cu mester saca Valero for di e formula. Croes ta haya cu Valero mester pasa e refineria pa Aruba y e isla aki yega na un acuerdo cu PDVSA al estilo di esun cu Corsou, di 25 aña.

PDVSA ta interesa, segun Glenbert Croes, pasobra nan a haya n di e reservanan di mas grandi di crudo pisa den e faha petrolero di Orinoco, cu ta un crudo pisa y door cu e refineria di Aruba tin dos delay coker pa kibra e crudo pisa cu despues por wordo procesa y produci productonan semi-acaba cu por wordo uza den otro proceso pa yega na un producto final.

E Parlamentario ta splica cu crudo pisa ta hopi barata compara cu crudo liviano.

Ademas PDVSA ta interesa den contempla supply gas pa Aruba, ya cu nan a haya un reserva grandi di gas entre Venezuela, Aruba y Corsou. Nan por evalua un pipa di gas for di Venezuela pa Aruba y esaki lo haci e operacion di e refineria menos costoso y alabes “friendly” pa medio ambiente. Ademas cu nan por yuda baha prijs di awa y coriente door di provee WEB cu gas pa su produccion, y tambe den uzo di autonan.

Croes ta bisa cu el a presenta un vision na PDVSA, unda Gobierno di Aruba ta bira doño di e refineria, aunke cu no tin placa pa inverti den dje. Aruba kier participacion mas activo den loke ta pasa den e refineria. Nan kier pa pone e refineria den un NV cu ta 100% propiedad di Gobierno y pa PDVSA inverti den dje. PDVSA ta papiando di mas cu un 1 biyon dollar cu por wordo inverti den e refineria pa pone bek riba pia. Den mundo petrolero, e ta bisa, mirando loke e refineria aki lo por produci, un suma asina ta factibel pa companianan multinacional. Ademas di inversion, e ta spera di por tin nan den un contracto di largo plaso, manera PDVSA tin’e na Corsou.

Fuente: http://www.diario.aw