Citgo Aruba ta exigi claridad urgente

“Te ainda den ningun di e documentonan cu a mira luz rond di Citgo no ta bin concretamente dilanti kico lo pasa cu Citgo Aruba den caso cu e proyecto di rehabilitacion di refineria no continua. E pregunta grandi ta si Citgo Aruba lo keda encarga cu e terminal di petroleo y e negoshi di productonan petrolero na mercado local y di transportacion mundial.”

Claridad y mas claridad ta loke e misterio huridico cu gobierno Mike Eman a firma pa Aruba cu Nicolas Maduro na 2016 ta exigi mientras futuro di Citgo mes lo ser dicidi e luna aki na Merca y na Rusia, manera DIARIO a presenta pa su lectornan y a ser confirma den prensa internacional.

Pa Citgo por a haci su entrada na Aruba na 2016, e pakete di acuerdonan cu gobierno Mike Eman contra tur regla a tene scondi pa Parlamento y pa pueblo di Aruba, tabata inclui cu lo kita e negoshi di productonan petroleo for di Valero y entrega nan na Citgo.

Awe, manera por a spera for di 2016, Citgo mes no sa kico su futuro lo ta. Manera DIARIO a anuncia na Aruba y a ser confirma durante fin di siman dor di prensa internacional, abogadonan di Presidente Juan Guaidó ta lucha den Corte na Merca pa evita cu parti di Citgo ta na benta como borg di Crystallex cu no kier pospone ehecucion di su derecho pa uza Citgo como pago di debenan di Venezuela.

Na mes momento Rusia a anuncia na Nicolas Maduro cu Venezuela mester paga su debenan prome cu fin di April. Rusia a nenga den ultimo informacionnan di bisa cuanto placa e mester ricibi di Venezuela y a bisa cu esaki ta secreto di negoshi.

Ta conoci si cu for di 2018 Rusia tambe a cuminsa realisa gestion pa cualkier momento cambia su borg den Citgo como propiedad.

Si Citgo ta situa na Merca, cu ta reconoce Guaidó como Presidente di Venezuela, PDVSA ta mara directamente na Rusia, cu na 2018 a manda funcionarionan halto, manera dirigente di su Banco Central, pa yuda Maduro atende asuntonan financiero di Venezuela cu ta un riesgo financiero grandi pa Rusia.

E situacion di Citgo, cu e luna aki tambe mester paga e prestamonan 2020 pa evita otro riesgo di ser bendi dor di companianan cu a haci prestamo na Venezuela, ta hopi peligroso.

Aruba mester defini kico ta pasa cu Citgo Aruba, cu tin alma di economia di Aruba cu ta combustibel den su man.

Fuente: Diario de Aruba