E dignatario a expresa cu e situacion na Venezuela ta sigui tenso y confuso. Aruba ta sigui e situacion di cerca hunto cu Marina Real y den coordinacion cu Corsow y Bonaire, pa nos pais ta prepara di e mihor manera posible.
Prome Minister a elabora tambe tocante e Refineria Citgo Aruba. Diahuebs ultimo, ehecutivonan di Citgo y di e refineria a reuni, y Citgo a anuncia cu debi na e sancion cu Merca a pone riba Venezuela, nan mester a retira varios trahador riba termino corto.
“Mas cu claro Gobierno no ta acepta esaki sin mas. Citgo tin un obligacion cu e trahadornan y mester cumpli cune. Gobierno lo no coopera cu e retironan aki. Nos gobierno mesora a tuma contacto cu e ehecutivonan nobo di e refineria pa evita e retironan aki mas tanto cu ta posible. Lamentablemente nos no tin tur cos den nos man, debi na e situacion tenso y confuso cu tin na Venezuela.
“Sinembargo, nos lo sigui haci tur esfuerzo posible pa evita cu e trahadornan local perde trabao. Y si nan perde trabao mes, atravez di instancianan gubernamental, cu lo intermedia pa nan haya trabao pa nan haya trabao cu prioridad.
“ E refineria ta strategico tanto pa nos na Aruba como pa Venezuela. Pero e circumstancianan ta complica, meymey di desaroyonan geopolitico, interesnan di varios otro pais. Nos meta ta pa mantene e continuacion di e refineria y henter nos Gabinete ta envolvi den esaki.
“Nos a bise den pasado y nos ta ripiti. Hasta si tin 1% so di posibilidad pa habri e refineria nos lo lucha pa logra habri e refineria.
“ Mester bisa si, cu locual nos ta bibando awo cu e refineria no ta nada cu nos no tabata sa for di principio cu nos a drenta gobernacion. Gobierno anterior, lamentablemente, envez di negocia cu interes di Aruba den mente, a negocia cu otro interesnan den mente. Nan a asocia cu hendenan dudoso. Nan a envolve nan mes den practicanan dudoso. Aruba lo carga e fama di tabata habri pa hendenan manera Carvajal y Rincon.
“ Y con caro esaki a y lo costa nos? Ainda nos mester haya sa. Y awe nos ta sinta cu e consecuencianan. Un acuerdo firma cu tin un pilar economico practicamente cera como rehen, den cual no a tene cuenta cu e interes di Aruba, sino cu interes di algun individuo, y un refineria cu no a habri ainda. Pesey desde principio di nos gobernacion, nos a duna e problematica aki hopi atencion. Nos a reuni cu ehecutivonan di Citgo den varios occasion e aña cu a pasa, desde Januari.
“Nos tur ta corda con Citgo a bin pa anuncia e slow down y cu tambe lo retira varios trahador. Nos a reuni tambe cu e Minister di Energia Venezolano, señor Quevedo. Loke a tuma lugar na Augustus. No a bay Washington na mas cu un ocasion pa reuni a atende e tema aki cu Departamento di Estado, y purba reuni cu OFAC pa cu e sancionnan. Sinembargo, sin resultado positivo te ainda. Y esaki no debi na nos na Aruba, sino debi na e partner inconfiable cu nos tin den e contrato. E partner cu gobierno anterior a informa nos cu tabata confiable, y cu supuestamente hasta Hulanda a aproba, y awor a resulta cu esey no tabata berdad. Sinembargo, ban enfoca riba e posibilidadnan nos dilanti.
“Tin un cambio na horizonte, awor cu a cambia e dirigentenan na Houston manera a keda anuncia e siman aki. Pasobra tin un chens du Gobierno Mericano tin mas confianza den nan y cu lo por logra lanta e sancionnan ta afecta Aruba tambe. Nos a pone e contactonan caba, nos ta haciendo tur esfuerzo pa e sancionnan wordo lanta y asina haya un partner serio pa rehabilita e refinenria.
“Manera mi a bisa, e problemanan cu e refineria no a cuminza awor. E situacion no ta nobo. Nos a pasa aden caba, y mescos cu e biahanan den pasado, nos lo no sinta man cruza. Nos a lucha su surpasa e desafionan y nos lo haci mesun cos y mi tin confianza cu nos lo surpasa e desafionan atrobe. Mientras tanto, pa loke ta e situacion na Venezuela mes, Corsow ta preparando pa fungi como un tipo di hub pa ayudo humanitario na Venezuela. Y mi ta bolbe enfatiza cu ni Aruba ni Reino lo no ta envolvi den accionnan militar.
“Mi ta haci un apelacion na tur hende pa keda trankil y ban sigui den oracion pa Venezuela tin un pronto resolucion”, Prome Minister mr. Evelyn Wever-Croes a conclui.
Fuente: Con información de Diario de Aruba
No hay comentarios:
Publicar un comentario
Envíenos sus comentarios y aportes informativos al tema. Recuerde que su comentario, aunque no sea publicado, puede ser tomado en cuenta para nuestros temas de investigación. Los comentarios con términos insultantes, ofensivos, denigrantes y que incumplan nuestras políticas serán rechazados. Sólo puede enviar comentarios de menos de 1 mil (1.000) caracteres.