(Aruba) Futuro stabil pa Aruba sin CITGO ta posibel

Cada dia cu pasa, e pregunta ta bira mas grandi. CITGO como proyecto por bira realidad na Aruba? Cada dia ta trece mas motibo pa pensa cu e proyecto CITGO lo keda un soño pa Aruba, cu mester por pensa riba un futuro nobo. DIARIO a analisa tur e aspectonan pa por yega na e conclusion cu futuro di Aruba sin CITGO na e momentonan aki ta brinda un stabilidad mas grandi pa Aruba cu futuro sin CITGO.
E condicionnan cu mester conduci na e realisacion di e proyecto tur dia ta empeora.

Cada dia cu pasa, e edad di e refineria ta subi. Na e momento aki ta inspecciona e instalacionnan cu tin cuatro aña inactivo, despues cu e compania di renombre Valero a yega na conclusion, cu e refineria ta mal negoshi.

Cuanto e gasto real pa rehabilita e refineria lo ta, mester bira conoci ora e inspeccion termina. Pero un inspeccion di e cartera di doño di CITGO, cu ta Venezuela, ta mustra cu CITGO ta jackpot di gobierno di Venezuela cu ta lucha pa por produci petroleo mientras prijs di petroleo ta cay.

E situacion actual ta mustra cu Venezuela tin motibo cu nunca el a bolbe pa duna un garantia serio cu e lo realisa e proyecto.

STABILIDAD DOR DI CAMBIO

Esaki ta nifica cu no por papia na e momento aki di stabilidad di e proyecto aunke inspeccion ta tuma luga como e parti menos costoso y mas barata di e proyecto total.

Por asumi cu e proyecto no ta presente den cifranan oficial di Gobierno pa otro aña tampoco, loke ta nifica luz cora despues cu Banco Central tampoco a haci caso di CITGO den su proyeccion oficial pa 2019.

Aruba den un crisis severo ta puntra su mes, kico lo pasa si CITGO no bini Aruba.

Analisis di DIARIO na e momentonan aki ta indica cu Aruba lo drenta futuro na un forma mas stabiel, si e lubida cu CITGO ta existi. Naturalmente den benta di productonan petrolero na Aruba e lo ta presente despues cu el a reemplasa Valero.

Pa haci e expresion aki, DIARIO ta basa su mes riba e panorama cu lo presenta su mes na momento cu oficialmente e proyecto pasa pa historia.

DESMANTELA PROYECTO PAGA PA CITGO

Prome Ministro Evelyn Wever-Croes den su prome reaccion riba e desaroyonan di CITGO na 2018, a mustra cu por busca otro compania pa inverti den e rehabilitacion of por busca otro destinacion pa e sitio.

DIARIO a bay investiga si den e palabranan aki por tin un contesta positivo pa Aruba.

Segun e acuerdo, CITGO lo mester paga Aruba un boet, cu por ta un entrada mucho mas sigur pa Aruba cu sigui cu incertidumbre riba e posibilidad di manda gas dor di e instalacionnan di basta edad di e refineria.

Den un relato di trahadonan algun luna pasa, e edad aki a ser treci dilanti como algo cu mester tene na bista ora ta papia di rehabilitacion.

Si CITGO no bini, lo mester cuminsa pensa riba desmantelacion di e refineria. Segun e contracto CITGO lo mester cubri e gastonan di desmantelacion, cu ta un proyecto grandi cu durante un periodo basta largo lo duna trabou.

Di e forma aki pa un temporada, CITGO lo brinda trabou indirectamente y sostene economia di Aruba te ora yega ora pa e despedi pero tambe paga pa e daño cu el a haci durante ultimo añanan.

Valero a paga su parti prome cu el a bay. Aruba a ricibi e placa segun e informacionnan cu tabata tin y cu ta mustra cu Valero a entrega prome cu el a despedi, un suma di mas cu 60 Miyon na gobierno anterior. 20 Miyon mester a bay den e fondo ambiental cu awor CITGO ta maneha.

E suma a inclui placa di belasting y limpiesa. Esaki ta nifica cu Valero a paga aunke segun expertonan internacional, e suma no a ser bon negocia.

ARUBA POR CUMINSACASO LEGAL

Si CITGO bay pasobra e no tabata tin placa pa e proyecto, Aruba por haya placa pa desmantela y haci resto di trabou?

Informacion ta bisa cu si. Aruba por hiba CITGO hues y Aruba por confisca CITGO y exigi pago di boet y cumplimento cu e acuerdo mescos cu CITGO lo a exigi pago di 300 Miyon Dollar si e gobierno actual di Aruba of su sucesornan na un forma visibel stroba realisacion di e proyecto.

Esaki talbes ta stroba gobernacion actual y politiconan actual di tuma medida contra CITGO y su doñonan, pasobra gobierno anterior a mara Aruba na e garantia di 300 Miyon Dollar cu mester paga CITGO pa proteha e compania entre otro contra otro politico Arubano cu lo por a actua contra CITGO segun gobierno anterior

Kico lo pasa despues di desmantelacion? DIARIO a analisa posibilidad pa atende cu suela contamina pa petroleo den mundo moderno.

Oportunidadnan nobo ta sigui mira luz manera expertonan internacional riba e materia aki ta trece dilanti. Mester tene cuenta cu ta for di añanan ochenta hopi pais na mundo mester a deshaci di refineria.

DIARIO di e forma aki kier mustra Aruba cu e por sobrevivi e actual situacion aunke e dicidi pa cambio. Aruba tin e oportunidad di bolbe na stabilidad economico si tuma e pasonan dirigi pa haci esaki. DIARIO lo sigui informa Aruba pa hunto enfrenta futuro.

Fuente: https://www.diario.aw