martes, 30 de octubre de 2018

(Aruba) Doño nobo pa CITGO lo por stop acuerdo

“Venezuela ta trata na paga su debe pa e no perde CITGO.” E realidad di e proyecto di refineria na Aruba a haya mas contenido durante fin di siman ora mundo financiero y petrolero internacional tabata sigui e desaroyonan rond CITGO.
Venezuela mester pone casi un biyon riba mesa como parti di pago y interes riba un prestamo cu PDVSA a haci den pasado y ta vence na 2020. CITGO ta sirbi como garantia cu PDVSA lo paga e debe aki.

Manera DIARIO a anuncia, e situacion di October 2017 a ripiti na October 2018. Mundo tabata en espera di e momento cu Venezuela ta paga.

E hecho cu PDVSA a bay di acuerdo cu CITGO lo ta garantia pa e debe cu e ta aden, ta prueba di e situacion financiero fatal di e compania di estado Venezolano cu no por brinda Aruba siguridad cu ta realisa e rehabilitacion di e refineria na Aruba.

Si CITGO cambia di doño, Aruba no tin contracto pa rehabilitacion mas.

CITGO GARANTIA PA DEBE DI PDVSA

Un bista riba e cantidad di prestamonan cu e compania di estado Venezolano PDVSA a haci, ta duna un indicacion di e situacion financiero di e compania petrolero cu a bira partner di negoshi cu Aruba na 2016.

CITGO, cu ta situa na Merca, ta e baca di lechi di PDVSA cu a dicidi di mara su entrada mas sigur na un pago di un prestamo pa cual CITCO ta garantia.

Ya na 2014 Venezuela a entrega casi mita di CITGO na Rusia como garantia pa e debenan cu e tin na Rusia. Pero e mayoria chikito a keda den man di Venezuela.

Na 2016, e aña cu Aruba tabata hubila pasobra el a cera un acuerdo cu CITGO pa reapertura di e refineria, PDVSA su situacion a bira tan preta, cu e a pone CITGO como garantia pa un prestamo riba mercado di placa, cu ta vence na 2020.

PDVSA a mara su mes na e forma con e lo paga e debe. Cu e no tin placa pa cumpli cu e pago di casi un Biyon na final di October, a keda demostra na 2017 ora na ultimo momento el a dicidi di paga pa no core riesgo cu e ta keda sin CITGO.

E historia a ripiti na 2018 ora ya Aruba a haya prueba cu PDVSA no por honra e acuerdo cu Aruba a firma pa rehabilitacion di e refineria.

CITGO MES CU MAS DI 3 BIYON NA DEBE

Pa sector internacional financiero y di petroleo, hasta si Venezuela paga e debe di PDVSA cu ta mara CITGO como garantia, e peliger cu cualkier momento e ta perde e refineria, ta sigui existi.

Mas importante ta, kico lo pasa cu CITGO si e bira parti di un di e companianan cu Venezuela mester paga.

CITGO mes mester cuminsa paga debenan existente, cu ta ser calcula na mas cu 3 biyon. Si bende e compania of como garantia di PDVSA e pasa pa otro doño, e no ta sali liber di paga henter of parti di e debenan.

Esaki ta encera, cu Aruba no por tene cuenta cu CITGO mes tin basta placa pa inverti den Aruba pasobra esaki no ta berdad. E ta resalta tambe den e hecho cu ta Gobierno Venezolano mester a bay pidi placa pa e prome 100 Miyon cu tabatin mester.

Rosneft, cu por bira un di e doñonan di CITGO si e dicidi cu e ta reclama e compania cu ta garantia pa pago di e loke e mester ricibi di Venezuela, no tin e mayoria pa dicidi kico ta pasa cu CITGO. Rosneft tabatin e garantia aki ora a firma e acuerdo cu Aruba, pero nunca gobierno a anuncia posicion di Rosneft. Ayera a mira con importante CITGO ta pa Rusia.

Tin tambe Crystallex, e compania minero Canades cu a haya permiso pa confisca e mayoria di CITGO. E decision di Hues a ser apela dor di gobierno di Venezuela y mester spera awor riba veredicto.

TRES COMPANIA A CERA REFINERIA DEN PASADO

Aruba lo bay haya un inversionista nobo pa e refineria si CITGO no por ser realisa? Sin duda cualkier compania na mundo lo haci loke gobierno anterior di Aruba no a haci cu ta encera un bon estudio di loke a bira un spada riba cabes di Aruba.

E prome parti di e estudio lo demostra cu tres compania a trata na haci negoshi cu e refineria, pero no a logra y mester a cera porta.

Lago a cay den un ambiente politico den un tempo cu hopi refineria na mundo a cera pa motibo di e crisisnan mundial di petroleo cu a cuminsa for di añanan 70.

Despues Aruba a conoce Coastal y Valero, dos compania conoci na Merca. Nan a haci loke Exxon a haci y a cera e refineria.

E situacion di PDVSA den Caribe, ta haci buskeda di un refineria mas pa Venezuela necesario. Hopi refineria na Venezuela ta den mal estado loke a afecta e exportacion di e pais cu ya tabata den problema.

Venezuela tabatin necesidad di e refineria di Aruba den su situacion actual mas ainda si tene cuenta cu CITGO ta su entrada sigura y di sumo importancia pa Rusia, cu a demostra esaki na 2017 y ayera.

Aruba lo haya otro compania dispuesto pa rehabilita un compania cu ainda no conoce un rapport di inspeccion despues di basta tempo sin actividad como refineria?

Tin hopi pregunta. E unico siguridad cu tin ta encera, cu PDVSA of Venezuela no por entrega Aruba garantia cu e proyecto refineria lo bira realidad.

No hay comentarios:

Publicar un comentario

Envíenos sus comentarios y aportes informativos al tema. Recuerde que su comentario, aunque no sea publicado, puede ser tomado en cuenta para nuestros temas de investigación. Los comentarios con términos insultantes, ofensivos, denigrantes y que incumplan nuestras políticas serán rechazados. Sólo puede enviar comentarios de menos de 1 mil (1.000) caracteres.

 
LO + LEÍDO...

LO + LEÍDO...