CITGO tin ganashi diario cu Aruba

“E free for all di PDVSA”. Cu e palabranan uza dor di mundo petrolero internacional, DIARIO a duna inicio na publicacionnan relevante ariba refineria di Aruba y e situacion actual. E realidad actual a ser presenta na pueblo cu un par di siman pasa a haya confirmacion di seriedad di e situacion cu yegada di e delegacion di PDVSA/CITGO cu a priminti cu ta sigui cu e proyecto cu a tranca pero no a duna garantia di loke por spera di e proyecto total.

DIARIO a insisti cu Parlamento mester tabata y awor mester bira mas activo pa por informa pueblo debidamente. DIARIO a kibra e barera di empresanan di Gobierno, cu ta stroba pueblo di Aruba comprende kico ta pasa.

Cu e promesa cu economia di Aruba lo a conoce un crecemento di 15 porciento y cu Aruba lo a conoce prosperidad, e proyecto refineria a ser lansa. Un puzzel legal a prohibi pueblo comprende e advertencianan di Hulanda y Merca. Tras di e puzzel tabata tin Gobierno anterior di Aruba y Gobierno Maduro di Venezuela. Parlamento di Aruba no a para riba transparencia ora a trata acuerdonan cu awe ta haci cu e refineria na Aruba ta paralisa pero Citgo tin ganashi cu importacion.

 GOBIERNO ANTERIOR A DESMENTI BERDAD CITGO 

E acuerdonan pa e refineria nobo a ser firma na Venezuela. For di prome cu a firma, Hulanda, Merca y publicacionnan internacional a adverti Aruba pa e peliger evidente. “CITGO ta propiedad di Venezuela,” ta e advertencia cu Aruba a haya di tur parti.

Confusion a cuminsa despues cu contracto a ser firma y Presidente Nicolas Maduro a bisa cu awor Venezuela tin cinco refineria.

Minister Mike de Mize a declara cu “CITGO ta e partner cu cual Gobierno di Aruba a alcansa un contracto y cu lo maneha e empresa for di Prome di Augustus. De Meza a bisa cu CITGO ta responsabel pa e refineria y tambe ta esun cu lo inverti.

Di e forma aki e berdad di CITGO no a bin dilanti. Tanto e hecho cu Presidente Maduro a uza CITGO como borg pa debe Venezolano na Rostnef di Rusia como e hecho cu ta cerca PDVSA a bay busca 300 Miyon pa cuminsa, ta contradeci e informacion di Gobierno di Aruba e tempo, cu companianan internacional a rechasa.

CITGO ta un subsidiario di PDVSA, e compania nacional petrolero di estado Venezolano cu a nace ora Venezuela a nacionalisa petroleo. Ora Aruba a firma e acuerdo cu CITGO, ya casi mitar di CITGO tabata borg di Rosneft manera Presidente Maduro a dicidi y Minister de Meza mester tabata na haltura di e realidad aki y di e situacion financiero desastroso di PDVSA.

CITGO, RdA, FMSA y NEGOSHI CU COMBUSTIBEL NA ARUBA 

A base di e acuerdo cu Gobierno di Aruba a alcansa cu PDVSA como doño di CITGO, Gobierno di Aruba a crea e compania di estado, Refineria di Aruba N.V. cu ta encarga cu asuntonan petrolero di Aruba.  E compania aki a haya e refineria pero tambe ta dicidi riba tur asunto petrolero na Aruba.

Asina Refineria di Aruba N.V., cu ta propiedad di Gobierno di Aruba, a bira doño di e compania Fuels Marketing & Supply Aruba N.V. (FMSA).

E compania aki ta dicidi na ken e ta huur su cinco pompnan di gasolin y ta dicidi riba e compania cu lo percura pa gasolin, diesel pa tur otro pomp di gasolin na Aruba. Tambe e compania aki ta dicidi riba e compania cu ta entrega combustibel pa avionnan na aeropuerto, na barconan y na WEB.

Pa por entrega e productonan importa, a firma acuerdonan cu CITGO Aruba combustibel limpi  y cu Novum Energy Trading pa High Sulfur Fuel Oil.

Relaciona cu e acuerdo aki, FMSA a yega na otro acuerdonan cu CITGO pa asina brinda servicio na Aruba.

Esaki ta nifica cu CITGO tin e mercado local pa abastece cu su productonan importa y cu ta ser warda den tankinan pa cual a yega na un acuerdo cu  compania FMSA tambe.

CITGO, e compania di PDVSA, tin entrada dor di su acuerdonan cu e companianan di Gobierno di Aruba.

ARUBA NO TIN ENTRADA REFINERIA 

CITGO, manera na 2016 a ser propaganda pa Gobierno anterior, no a produci e crecemento economico di 15 porciento pa Aruba, cu a scrap CITGO como puesto di entrada for di su presupuesto.

A bisa Aruba cu e aña aki 600 persona lo a bay traha na e refineria modernisa, cu pipanan di gas for di Venezuela y cu indirectamente 3000 persona lo a haya trabou.

Economia lo a crece cu 6.7 porciento na 2016 y 5.7 porciento na 2017.

Ningun di e promesanan a bira realidad y Aruba mester haci un ehercicio mas grandi pa por mantene su mes flotante riba tereno financiero, economico y social.

Aruba no por spera na e momentonan aki cu CITGO por cumpli pasobra pa CITGO cumpli, PDVSA y Gobierno Venezolano mester cumpli ya cu ta trata di companianan di estado.

Mientrastanto pa pueblo ta dificil comprende cu e panorama di companianan di Gobierno. Hecho ta cu Aruba ta un mercado pa productonan importa di CITGO a base di e acuerdonan presenta den e articulo aki.

E mercado cu tabata di Valero mester a ser entrega na Gobierno ora e firma contracto cu CITGO y tambe Valero a entrega su Sales and Marketing na Aruba.

Si pa e refineria cu tabata e punto central, CITGO no a cumpli cu Aruba, pa e productonan importa pa medio di companianan di Gobierno di Aruba, Aruba a cumpli cu CITGO.

DIARIO ta continua cu su labor pa presenta informacionnan na Aruba, cu ta cuminsa realisa kico a pasa den e sector petrolero di e pais.

Fuente: https://www.diario.aw ->> Ir