(Aruba) Refugiado por crea calamidad social

Origen di e problema di refugiadonan mester ser busca na Venezuela. Refugiadonan ta huy di hamber, enfermedad, miseria, situacionnan inhumano na un pais sin rumbo economico y financiero. Venezuela tin tur ingrediente pa tur su ciudadanonan por gosa di un bida di plenitud. Venezuela tin espacio, placa, edificionan y tur loke mester pa su poblacion biba sin problema. Mescos cu Gobierno di Reino no por reemplasa Gobierno di Aruba, e gobernantenan di Aruba no por asumi responsabilidad di Gobierno Venezolano. E motibo ta simpel: Aruba no tin e recursonan necesario pa por duna asistencia den e drama di tal magnitud.

Mientras e catastrofe humanitario mas grandi den historia di America Latino tabata sigui crece, DIARIO a spierta a base di factornan concreto cu Aruba mester yega na un protocol y plan pa atende cu e problema di refugiadonan. Awe cu e bom a rementa, DIARIO ta resumi.

E ISLA NO TIN ESPACIO

Pa por yuda otro, tanto esun cu ta brinda ayudo como esun cu ta ricibi yudansa, mester ta bon. Sin e problema di refugiado, Aruba a yega na un punto cu e mester puntra su mes con e kier pa su poblacion sigui crece.

Un isla, un pais, tin frontera y limitacion di tereno. Aruba ta un isla chikito compara cu e teritorio grandi di Venezuela. DIARIO a puntra unda ta bay crea luga pa tur refugiado biba.

Aruba ya a entrega un gran parti di e terenonan bashi cu ta necesario pa un comunidad por gosa di naturaleza necesario pa un bida sano y den balansa.

Por habri tentnan tur caminda pa refugiado biba. Europa ta un di e paisnan cu tin e prueba kico ta pasa ora refugiado mester biba den tent sin e posibilidad di gosa di un vivienda aceptabel y hiba un bida normal. Situacionnan explosivo den campamentonan di refugiadonan ta un problema enorme pa paisnan Europeo.

Aruba tambe por crea un calamidad social den un situacion di leynan nacional y internacional cu no a atende e asunto di refugiadonan nunca manera mester ta. Mundo nunca a prepara su mes pa e forma explosivo cu migracion lo a interumpi normalidad y frontera di ley.

ARUBA NO TIN PLACA

Aruba ta den un problema financiero cu a exigi tur ciudadano baha nan gasto personal. Nan mester aporta mas na nan pais cu tin un problema cu su presupuesto.

Gobierno di Aruba a introduci medidanan di austeridad pa por cumpli cu su debernan enfrente e ciudadanonan di Aruba.

DIARIO ta resumi tur e debernan colectivo di pais Aruba enfrente ciudadanonan: school pa muchanan, trabou pa adultonan, posibilidad pa desaroyo di hobennan, cuido medico. Tur esaki por ser resumi den un terminologia: Gobierno mester garantisa un bida aceptabel na tur su ciudadanonan manera constitucion ta exigi.

Cuido medico sigur ta esencial ya cu manera DIARIO a ilustra na diferente ocasion, esaki ta un di e motibonan grandi cu Venezolanonan ta bandona nan pais.

Hulanda ta un testigo sigur cu Aruba no tin placa pasobra Hulanda ta conoci cu tur gasto di Aruba y a duna instruccion kico mester haci pa evita un desastre financiero.

DERECHO HUMANO DI CIUDADANO

Prioridad di Gobierno di Aruba ta, pa garantisa e derecho humano di ciudadanonan di Aruba cu no por pone na peliger.

Den esaki tambe DIARIO tabata hopi cla. Na un forma amplio DIARIO a relata cu yudansa na refugiadonan mester contene cuido medico. Central lo ta pa sigura cu enfermedadnan cu no por a trata na Venezuela debi na falta di prevencion, test, remedi, provisionnan pa cuido medico por plama cerca poblacion di Aruba.

Mester evita cu siguridad personal di e ciudadano y siguridad nacional di e pais ta ser afecta. Frontera di Aruba ta lama cu ta sumamente dificil pa controla. Con Aruba ta haya e garantia cu entre refugiadonan honesto, hende peligroso no ta drenta e pais?

Derechonan humano di e ciudadano, hancra den Constitucion di e pais y Statuut di Reino, ta exigi cu tur cu drenta e pais mester pasa den e proceso pa duna prueba cu nan no ta pone e pais y e ciudadanonan na peliger.

DIARIO ta resumi tur advertencia cu como vocero di Pueblo el a presenta. Condicionnan di bida na Venezuela mester normalisa pa Gobierno di e pais carga su responsabilidad.

Aruba ta comprende e dolor di e pueblo Venezolano pero ta imposibel pa Aruba reemplasa Venezuela. E solucion di refugiadonan ta ora nan por biba sin problema atrobe na nan pais. Mientras plataforma internacional no por garantisa esey, no por impone riba Aruba un compromiso cu Aruba no por asumi ni awe ni mañan.

Fuente: https://www.diario.aw ->> Ir