(Aruba) Citgo a anuncia inversion den fase 2 entrante 1 di September

Dialuna atardi Minister President Evelyn Wever-Croes y Minister di Labor Glenbert Croes a reuni cu ehecutivonan di Citgo. Durante e reunion Citgo a anuncia cu lo cuminsa cu fase 2 di e inversionnan entrante 1 di september.
Ta trata aki di trabaonan di inspeccion pa prepara pa e rehabilitacion di fase 3. Den e fase aki tin un inversion planea di 35 miyon.

Esaki sigur ta un bon noticia pa Aruba pa motibo cu unabes esaki wordo realisa, lo crea tambe mas di 150 cupo di empleo adicional di cual mayoria lo ta empleado local, treciendo e total di empleado riba 500.

Actualmente Citgo tin 390 empleado (incluyendo contratista) y 87.5% di e empleadonan ta local. Gobierno ta satisfecho cu e desaroyo aki, y lo traha hunto cu Citgo pa sigura empleo pa localnan prome.

Citgo a indica cu e fase 2 cu lo inicia dia 1 di september lo tin un duracion di 8 pa 10 luna. E financiamento pa e fase aki ta disponible, y no ta cay bou di e sancionnan di Merca contra Venezuela.

Citgo ta indica cu e kier finalisa e proyecto pa asina crea mas cuponan di trabou pa nos hendenen. Na fin di april e fase 2 mester ta kedando cla pa cuminsa cu fase 3 cu ta tambe e ultimo fase. Fase 3 lo tarda 18 luna.

Gobierno di su banda a enfatisa cu e forma con no tabata tin inversion definitivamente no tabata bon pa Aruba y kier mira cu accionnan pronto pa cu trabaonan realmente cuminsa na e fase 2. Tin speransa atrobe. Gobierno y Citgo lo sigui reuni regularmente pa sigui e desaroyonan aki di cerca.

Fuente: https://www.diario.aw ->> Ir