viernes, 18 de mayo de 2018

Gobierno di Aruba no ta otorgando amnistia ni asilo na Venezolanonan

Diahuebs mainta tempran gobierno a convoca un conferencia di prensa extraordinario, den cual Prome Minister mr. Evelyn Wever-Croes, a referi na algun aspecto cu tin di haber cu e situacion na VENEZUELA. Na prome lugar e dignatario a indica cu a base di cierto rumornan cu tin den comunidad, tin noticianan cu a wordo difundi cu gobierno, na caminda pa eleccion na Venezuela, Diadomingo 20 di mei awor, lo ta dunando amnistia.

Enfaticamente Prome Minister a bisa cu esaki no ta e caso. E mandatario a subraya cu na Aruba e regla ta cu si e persona tin un permiso e por keda aki y si no tin un permiso no por keda.

Esaki ta y lo keda e caso. Pues nada a cambia. E rumor aki a conduci cu centenares di hende bay haci peticion pa asilo politico.

Prome Minister a subraya cu asilo politico ta algo hopi serio y solamente e ta wordo duna si e bida di e persona ta core peligro si ta keda na su pais, di cual e ta bin.

Personanan cu ta bin Aruba pa biba mihor no tin derecho riba asilo politico y no tin ni nodi pidie. Den e caso aki e mandatario ta referi na imigrantenan.

Den e caso aki ta hopi importante pa haci un bon distincion entre asilo y migrante. Asina e dignatario a señala.

Prome Minister a duna di conoce cu varios peticion pa asilo politico a wordo haci na Aruba y ningun di nan a wordo honra.

“Bisando esaki mi kier bolbe bisa cu ta hopi importante, pa nos keda cu cabes frio, den e temporada unda tin asina tanto desaroyo y reto den nos pais bisiña”, nos prome mandatario a expresa.

“Difundi rumornan cu ta bruha tera, cu ta trece cierto sensacion no ta yuda nos aworaki. E momentonan aki, mi ta kere como pais, lo ta hopi bon si nos uni pa nos enfrenta e retonan uni, pasobra e retonan ta hopi, hopi grandi”, Prome Minister a expresa.

E mandatario a haya informacion di e rij grandi di personanan para na Dimas wardando pa e promesa wordo cumpli. For di diaranzon anochi caba el a reuni cu e director di DIMAS tocante e tema aki, y un biaha mas a reitera cu Gobierno no tin dunamento di asilo politico ni amnistia! E situacion pa loke ta trata permiso ta sigui igual. “Si bo ta na Aruba cu titulo legal bo por keda si bo ta na Aruba sin titulo legal bo no por keda”, e mandatario a reitera.

Pa finaliza e tema aki e dignatario a expresa cu DIMAS ta sigui cu su tareanan normal di atende publico segun afspraak. Pa e tema di asilo a bin cu otro palabracion cu DIMAS lo tin den su ehecucion, pa asina mantene orden y trankilidad akinan tambe.

Fuente: https://www.diario.aw

No hay comentarios:

Publicar un comentario

Envíenos sus comentarios y aportes informativos al tema. Recuerde que su comentario, aunque no sea publicado, puede ser tomado en cuenta para nuestros temas de investigación. Los comentarios con términos insultantes, ofensivos, denigrantes y que incumplan nuestras políticas serán rechazados. Sólo puede enviar comentarios de menos de 1 mil (1.000) caracteres.

 
LO + LEÍDO...

LO + LEÍDO...