martes, 8 de mayo de 2018

ConocoPhillips ta cla pa tuma cargo di e activonan Caribense di PDVSA

(Aruba) E compania di petroleo Mericano, ConocoPhillips a bay pa tuma e activonan Caribense di e compania petrolero estatal di Venezuela, PDVSA, pa impone un sentencia arbitrario di 2 biyon di dollar durante un decada di nacionalisacion petrolero di su proyectonan den e pais Sur Americano, segun tres fuente familiarisa cu su accionnan.

E compania Mericano ta concentra riba e instalacionnan di e islanan Corsou, Boneiro y St. Eustatius, cu ta desempeña un papel clave den e procesamento, almacenamento y mescla di petroleo di PDVSA pa exportacion. Nan a ricibi documentonan di corte, freezing e assetnan y por prosegui pa por bende nan, un di e fuentenan a bisa.

E maniobranan legal di Conoco por afecta ainda mas e ingresonan petrolero decreciente di PDVSA y e economia convulsiona di e pais. Venezuela ta depende casi por completo di exportacionnan di petroleo, cu a bin ta reduci den un tercio desde su piek y su refinerianan ta coriento solamente riba un 31 porciento di e capacidad den e prome trimester.

E pais Sur Americano ta den e gara di un depresion profundo cu un escased grave di medicamento y alimento, tambe un exodo creciente di su poblacion.

PDVSA y e Ministerio di asuntonan exterior di PDVSA no a duna comentario diadomingo riba e peticion pa duna comentario. Autoridadnan Hulandes ta bisa cu nan ta evaluando e situacion na Boneiro.

E demanda di Conoco contra Venezuela y e estatal PDVSA den corte internacional, a yega na un total di 33 biyon di dollar, e suma mas grandi pa cualkier compania.

“Cualkier impacto potencial riba comunidadnan ta resultado di e expropriacion ilegal di PDVSA di nos accionnan y su decision pa ignora e huicio di e tribunal di ICC,” Conoco a bisa den un email pa Reuters.

PDVSA tin interesnan significante den Caribe. Na Boneiro, e ta posee e terminal BOPEC di 10 miyon di bari cu ta maneha e envionan di logistica y combustibel na e clientenan, particularmente den Asia. Na Aruba, PDVSA y su unidad Citgo, ta huur e refineria y e terminal di almacenamento.

Na St. Eustatius, e ta huur tankinan di almacenamento den e Statia Terminal, propiedad di NuStar Energy di Merca, unda cu 4 miyon di bari di crudo Venezolano ta reteni riba ordo hudicial, segun un di e fuentenan.

NuStar ta conciente di e ordo y ta “evaluando nos opcionnan legal y comercial,” vocero Chris Cho a bisa. E compania no ta spera pa e asunto cambia su bista riba ganashi, el a bisa.

Conoco tambe ta busca pa anexa e inventarionan di PDVSA na Corou, cas di Isla Refinery y e terminal di petroleo na Bullenbaai. Pero e ordo no por ta enforsa inmediatamente, di acuerdo cu dos di e fuentenan.

Riba diabierna, PDVSA a ordo su tankeronan di petroleo cu ta nabegando den lama Caribe, pa bay bek Venezuela pa evita accion di corte, un di e fuentenan a bisa. Varios cargo di crudo Venezolano ta reteni of incauta den e ultimo añanan pa tarifanan di flota cu no ta paga y debenan relaciona.

“Esaki ta teribel (pa PDVSA),” un fuente familiar cu e ordo di corte a bisa. E compania estatal “no por cumpli cu tur e volumen acorda pa exportacion” y e accion di Conoco ta pone na peliger su capacidad di manda fuel oil pa China of pa accede na e inventarionan cu ta exporta for di Boneiro.

Na e Camara di Comercio Internacional (ICC), Conoco a exigi 22 biyon di dollar for di PDVSA pa kiebro di contracto y perdida di posibel ganashinan for di dos empresa conhunto productor di petroleo, cu a nacionalisa na 2007, bao di e presidente di Venezuela, Hugo Chavez. E compania Mericano a sali despues for di e pais, despues cu e no por a yega na un deal pa converti su proyectonan den joint ventures controla pa PDVSA.

Un caso separa di arbitrahe, cu a envolve e perdida di su interesnan Venezolano, ta dilanti di un Tribunal di Banco Mundial, e Centro Internacional pa e Solucion di Diferencianan Relativo na Inversion.

Exxon Mobil Corp tambe a presenta dos demanda di arbitrahe separa riba e nacionalisacion di su proyectonan na Venezuela na 2007.

Fuente: Agencias - https://www.diario.aw

No hay comentarios:

Publicar un comentario

Envíenos sus comentarios y aportes informativos al tema. Recuerde que su comentario, aunque no sea publicado, puede ser tomado en cuenta para nuestros temas de investigación. Los comentarios con términos insultantes, ofensivos, denigrantes y que incumplan nuestras políticas serán rechazados. Sólo puede enviar comentarios de menos de 1 mil (1.000) caracteres.

 
LO + LEÍDO...

LO + LEÍDO...