miércoles, 4 de abril de 2018

(Aruba) ‘Gobierno mester ta transparente riba combersacion cu representantenan di Citgo/PDVSA’

Un delegacion di Citgo a yega Aruba pa atende cu gobierno (MEP-POR-RED) e situacion actual di slow down di e refineria y su eventual reapertura. Ya caba na bispo di siman santo y durante e debate tocante reparticion di cartera/ministerio of reunion di LIM (Landsverordening Instelling Ministeries) den parlamento a keda anuncia cu un delegacion di representantenan di Venezuela y Merca di e compania petrolero Citgo/Pdvsa lo bini pa atende e asunto aki.

Rond di asunto aki, ayera ex minister y parlamentario Arthur Dower (AVP) a bisa cu ni gobierno y tampoco Citgo por bisa simplemente cu nan no ta interesa mas riba e proceso di reapertura di e refineria na San Nicolas. Esaki debi cu ta existi un contract cu ta compromete ambos parti. “Bo mester argumenta y bo tin contract cu bo tin cu cumpli cu ne.”

Tambe e ta spera cu den e combersacion cu nan ta bay sostene cu e delegacion aki, nan por ta transparente y duna informacion na comunidad. Particularmente kico lo sali di e combersacion aki, si nan lo sigui y nan lo haci esfuerso pa sigui cu e proyecto di refineria, of si nan ta bay desmantela e refineria pa bin cu otro proyecto manera plantacion di cannabis. Tambe sr. Dowers ta haya relevante pa bin cu e analisis cu un grupo ta bin realisando di e contract cu a keda firma entre e gobierno anterior y Citgo, pa informa pueblo kico nan a haya. Pero tambe cuanto nan a gasta den e tipo di analisis aki.

Diferente tendencia
El a recorda cu ora nan a bay negosha e reapertura di e refineria nan a bay cu un grupo serio y te hasta conseho a bin di reino. Segun e parlamentario, gobierno actual (MEP-POR-RED) a saca un fragmento so di e conseho aki. Pero nan no a bin completo unda ta wordo bisa cu si tabatin risico, sinembargo mirando e posibilidad pa crea mas crecemento economico nan ta considera cu pais Aruba mester a hacie. Un decision cu a conta cu sosten no solamente di e partido di gobierno sino di oposicion tambe, y otro partnernan cu tambe a kere cu reapertura di refineria mester tuma luga.

Sinembargo el a considera y condena esaki como no digno, e forma como miembronan di e coalicion di gobierno tabata chercha e hendenan di otro pais. Y awor nan mes ta papia cu e mesun hendenan cu nan mes a lastra y chercha. Te hasta nan ta bisa cu tur hende den Citgo ta cera y insulta hende. Mientras cu awor tin hendenan cu a bin Aruba pa papia riba situacion di e refineria. Esaki despues cu nan a wordo tilda di corupcion y sinberguensa. Mientras cu den e mesun seno di gobierno tin diferencia tendencia riba futuro di refineria.

Un conclusion cu e ta haci ta cu mientras MEP den e caso aki su lider y prome minister kier mira e tereno aki bashi pa explora e posibilidad di cultivo di cannabis. Tambe tin otro grupo cu ta dispuesto pa haci e esfuerso pa mira refineria den operacion. Mientras tin otro grupo di partido POR cu ta anti refineria cu tin otro interes pa bin cu proyecto turistico of hotelero den e area aki.

E ta haya cu tin momentonan cu ta demanda pa no haci wega politico, specialmente ora cu bo ta sinta den gobierno. Sinembargo e ta considera cu e politiconan actual cu ta sinta den Cocolishi ta un team cu keto bay ta hibando campaña contra pais Aruba y contra partido AVP, sin cu nan ta consciente di e daño cu nan ta cometiendo.

Tambe el a condena e echo cu den e reunion di LIM partido MEP a ‘bira lomba’ pa un mocion di fraccion di AVP. E ta considera e mocion aki uno simpel cu no tabatin niun obligacion of cosnan negativo. E mocion aki gewoon tabata pidi gobierno pa sigui haci esfuerso pa pone e refineria funciona. Ya cu segun nan calculacion e operacion di e refineria lo trece ‘hopi placa’ pa nos economia. Ya caba e ta produciendo entrada pero e por produci hopi mas si e pasonan necesario wordo tuma debidamente, el a bisa.

Fuente: https://www.bondia.com - (PULSE AQUÍ)

No hay comentarios:

Publicar un comentario

Envíenos sus comentarios y aportes informativos al tema. Recuerde que su comentario, aunque no sea publicado, puede ser tomado en cuenta para nuestros temas de investigación. Los comentarios con términos insultantes, ofensivos, denigrantes y que incumplan nuestras políticas serán rechazados. Sólo puede enviar comentarios de menos de 1 mil (1.000) caracteres.

 
LO + LEÍDO...

LO + LEÍDO...