Citgo Aruba: tur contratista mester cumpli cu ley

Despues di un control di autoridadnan diamars bou di personal di man camp di Citgo Aruba, unda a haya varios persona sin documento pa traha, Citgo Aruba a reacciona finalmente. Nan ta urgi pa tur contratista di Citgo Aruba Refinery mester cumpli cu ley y regulacion local. Nan confirma cu a tuma luga un inspeccion pero e compania no ta confirma si Guarda nos Costa a bay cu 60 trahado.

“Durante e inspeccion nan a tuma nota di varios contratista den e proceso di desmobilisacion a consecuencia di e anuncio recien di un slowdown den e proyecto di rehabilitacion di e refineria. Citgo Aruba a duna tur cooperacion durante e inspeccion aki y lo sigui haci esaki. Mas aleu, e compania ta exigi pa tur empleado y contratista cumpli cu ley- y regulacionnan local”, asina Citgo Aruba a bisa den un relato.

Un punto cu Bon Dia ta observa ta cu den nan relato Citgo no ta bisa nada di nan responsabilidad. Na Aruba nos tin pa varios aña e ley Ketenaansprakelijkheid. Esey ta nifica cu compania cu ta huur contratista tambe mester percura cu e (sub) contratista ta cumpli cu e leynan. Pues e compania principal cu ta huur contratista tambe ta responsabel y mester controla si su sub contratista ta mantene nan mes na ley. E ley Ketenaansprakelijk ta bisa cu e compania principal (den e caso aki Citgo Aruba) ta ‘hoofd aansprakelijk’ pues ta esun responsabel principal. Den e caso pues cu e contratista no ta paga su belasting, departamento di impuesto ta bay cerca e compania principal pa cobransa di impuesto, etc.

Te ainda Bon Dia no a ricibi informacion cuanto contratista tabatin un permiso valido pa por traha na Citgo.

Contratista principal pa Mancamp di CITGO mes sorprendi cu ‘slowdown’

E contratista principal encarga cu e asina yama ‘mancamp’ pa CITGO Aruba, esta Azurra a keda sorprendi cu e anuncio abrupto di CITGO pa un ‘slowdown’ siman pasa. Den un entrevista exclusivo cu NoticiaCla, e director di e compania, Antonio Azzarati a bisa cu mientras cu CITGO a bisa nan tambe cu ta un slow down, pa nan esaki a nifica un ‘shutdown’. “Nan a invita nos pa un reunion y a participa nos cu nos trabou ta para mesora” Azzarati a splica e portal. Algo cu nan no ta compronde pasobra tabata falta apenas 3 pa 4 siman pa termina e trabou.

CONTRATO

Azzarati ta splica cu nan a haya e contracto entre 20 otro compania pa traha e mancamp. Pa por a completa e trabou, nan a busca 5 subcontratista cu durante un periodo di entre 8 pa 9 luna, mester a caba e trabou cu nan a inicia na juli di 2017. E cantidad di trahado mester tabata local, pero nan tabatin nan hendenan cu mester a supervisa e trabou tambe. Azzarati no por a bisa cu exactitud cuanto Arubiano tabatin ya cu esaki tabata varia pa trabou. Pero e grupo di personal pa supervisa e trabou, tabata 35. E trabou tabata cla pa 97% segun Azzarati, y tabata falta apenas 3 pa 4 siman di trabou. Como tal e decision pa para nan trabou, a bin totalmente como sorpresa. Mes momento si, Azzarati ta admiti cu e contrato cu nan tabatin cu CITGO, ta stipula cu na cualkier momento, e contracto por keda termina. Algo cu a sosode tambe. Awor ta keda trabou pa averigua cuanto placa falta pa paga e contratista y kico mas tin cu haci prome. A lamenta e forma con e cos a bay ya cu di un ora pa otro mester a para e trabou, cu a pone cu esnan cu mester a ‘desmantela’ cierto cosnan no por a haci esey mas y ta otro hende mester a core finalisa e parti ey.

Fuente: http://www.bondia.com // http://www.noticiacla.com