(Aruba) Parlamentario Alan Howell: 60 persona trahando ilegal na Mancamp di Citgo ta inaceptabel

E noticia cu a gara un total di 60 ilegal na e Mancamp di Citgo ta algo cu Parlamentario di POR, Alan Howell ta considera un abuso di marca mayor. E ta bisa cu emplea un trahador ilegal no ta aceptabel, corda 60! “60 persona trahando ilegal na Mancamp di Citgo ta inaceptabel”.
E parlamentario ta mustra riba e echo cu na e momentonan aki tin hopi Arubiano sin trabou y cu ta dificil pa nan por pone un pida pan riba mesa pa cria nan famia. Pero mientras cu esaki ta un berdad doloroso pa hopi famia na nos isla, tin otro hendenan cu ta comete no solamente e abuso, pero tambe e falta di respet pa nos hendenan y ta tuma ilegalnan na trabou.
E personanan ilegal aki lo por yega tambe den cierto casonan na comete atraco of otro actonan ilicito riba nos isla y ta bira dificil pa autoridadnan por saca afo ken nan ta debi nan estado di ilegalidad na Aruba. Loke ta hacie mas tristo ta cu esnan cu ta contratando e ilegalnan aki ta nos propio Arubianonan.
Howell ta considera cu ta hopi importante pa esnan cu ta comete e acto ilegal aki haya un castigo of boet pisa pa evita cu e practicanan aki sigui tuma lugar y nos hendenan local sigui wordo perhudica.
Na mes momento el a manda palabranan di pabien na Warda Nos Costa pa e tremendo trabou haci y a pidinan pa sigui ruim op de boel cu man duro.

Sindicato FTA ta urgi Gobierno sinta na mesa cu Citgo y pone nan cumpli

Den cuadro di e decision tuma door di Citgo pa slow down e proyecto di rehabilitacion di e refineria, e sindicato a pidi un reunion cu Gobierno pa haya un bista riba e situacion y kico por spera. Pero despues di e reunion, segun e Presidente Hubert Dirksz, el a sali mas preocupa.

Prome cu esey e sindicato FTA tabatin un encuentro cu Mediador di Gobierno unda tambe tabata presente representantenan di e sindicato IOWUA, y di e companianan Oduber Contractor y Doushar, unda a dicidi cu ta miho laga Gobierno atende cu e asunto di refineria y via di nan haya tur e informacionnan.

Segun Dirksz, e impresion cu nan a keda cun’e awor ta cu e situacion ta mas complica di loke nan a pensa. “Nos ta mas preocupa di loke nos tabata.”

Tin un palabracion cu e refineria mester ta cla pa na 2020 produci 900 mil bari pa dia y ta mira cu esaki no ta bay worde realisa. Si durante un cierto tempo cay den un atraso mes, y si sobrepasa esaki, lo no por cumpli mas cu e fecha ariba menciona. Y esey ta nifica cu lo ta violando puntonan acorda den e contracto entre Citgo y pais Aruba. “Nos tin miedo cu esey pasa y nos tin miedo di e consecuencianan si e scenario cambia. Nan ta simplemente saca e plug bay, mientras cu e contratistanan ya caba awor no ta ricibiendo nan placanan.

E situacion huridico ta complica, segun Dirksz. Ariba tin e compania Citgo y bou di dje tin diferente consorcio. “No t’asina cu e compania local ta atende directamente cu Citgo. Tin companianan manera VEC, Azzura, etc., cu a worde menciona. E peligro ta cu si algo pasa y e refineria bay, na unda nan ta bay claim. El a bisa cu tur e companianan ey ta dependiendo di e trabaonan den e refineria y sperando riba mas trabao.

FTA ta haya cu e incertidumbre aki no ta bon y ta momento pa Gobierno yama Citgo na mesa, pa laga nan papia palabra cla y cumpli cu loke ta para den e contracto. Hecho ta, segun Dirksz, cu e actitud di e multinacional aki no ta esun corecto. Pa e motibo aki tambe, e companianan local mester uni, cera cabes, pa hunto enfrenta esun cu cual nan tin contracto, sea ta un sub contratista of Citgo mes. Awor ta keda na Gobierno pa actua, pero FTA ta spera di berdad cu e trabaonan aki no ta bay cay atras.

Di otro banda, e aspecto fastioso ta cu e companianan local a firma un contracto cu e consorcio di Citgo y den cual ta para cu na cualkier momento e contracto por worde para. Pero esaki no ta di acuerdo cu leynan labora pa cual FTA no ta compronde pakico a permiti cu tipo di contractonan asina a worde firma.

Fuente: https://arubanative.com // https://www.diario.aw