(Aruba) Expectativa di estimulo di 280 miyon florin for di Citgo na nos economia no a, ni ta bay realiza

Parlamentario sra. Setty Christiaans a elabora tambe riba e tema di CITGO, enfocando riba e expectativanan cu ex-minister di Economia a crea pa pueblo y pa comercio, pero cu no a realiza. El a expresa cu ex-minister di economia, awe den Parlamento, a papia den pasado di un estimulo di 280 miyon florin den nos economia, den aña 2017, locual no a, ni lo tuma lugar.

Na 2018, el a anticipa cu danki na e actividad di Citgo ta bay stimula e economia den 6.6% cu lo bay contribui na e GDP di e pais.

Na 2017 el a anticipa cu esaki ta bay tin un efecto di 5.8% riba e GDP. Y con e economia di Pais Aruba a caba na aña 2017? Ainda e cifra no ta conoci, pero nos tur sa cu practicamente e ta cero. Anto ainda e ta expect cu esaki ta trece 180 pa 240 miyon pa e pot di gobierno, cu no ta drenta, y ademas e ta pensa cu esaki lo a stimula e forza laboral cu 3.1%.

Pues por imagina aworaki, sra. Christiaans a expresa, un Parlamentario cu tabata Minister cu ta cla pa bisa cu MEP no tin plan, pero tur loke nan a pone riba plan tampoco a realiza.

“No ta pasobra MEP no tin plan of gobierno no tin plan, logicamente nos ta papiando cu nos ministernan di cerca, pa asina nos tene bon cuenta den ki direccion nos ta bayendo, pero no esey sino ta e decepcionnan cu nos ta hayando”, e Parlamentario a menciona.

El a haci enfasis riba e expectativanan falso cu e ex-minister a crea no solamente pa pueblo, pero tambe pa gobierno, cu tur cos ta bay ta bon den nos economia, pero awor e realidad ta dal cu nos no tin 280 miyon pa draai den nos economia ni e crecemento di 5.8% cu no a sosode aña pasa ni e 6.1% e aña aki. Anto e ora ey kico nos ta suppose di haci?

E parlamentario a subraya cu si e deal a wordo haci dos aña pasa, gobierno anterior mester a realiza caba cu nos no ta yegando na loke e deal aki ta contene.

MEP no sa e contenido di e deal aki pero aworaki tin tecniconan ta analizando pa wak kico ta e situacion. Tabata tin un documento di mas cu 280 pagina cu Staten no a tuma tempo pa revise completamente y por huzga mihor kico pa haci.

E dama parlamentario a finaliza bisando cu pesey ta mihor pa stimula nos economia for di industrianan chikito na lugar di bin cu expectativanan grandi cu no ta bay realiza despues. Esey ta e filosofia di MEP.

Fuente: https://www.diario.aw