Venezuela dentro di poco lo duna claridad riba cua productonan nan ta considera ilegal pa wordo exporta pa Aruba

Durante e conferencia di prensa semanal di Gobierno, Minister di Finanzas y Asuntonan Economico Xiomara Maduro tambe a papia tocante e decision di Venezuela pa cerca comunicacion maritimo y aereo cu Aruba.

El a bisa cu locual ta pasando aki ta un escalacion, mirando cu for di 2016 e Gobierno di Aruba di e tempo ey tabata na altura di e situacion di ilegalidad, pa loke ta productonan di Venezuela cu no mag di yega Aruba.

“Na 2016 a hala atencion y a pidi pa Aruba drenta den accion, pero mirando cu esey no a sosode, bo ta wak e escalacion, unda cu Venezuela a tuma e medida”.

“Diasabra nos a reuni cu e departamentonan di entre otro Douane, Kustwacht, Haven Meester, Imigracion y e Departamento di Relacionnan Exterior, pa por mira kico ta e señalnan y kico concretamente nos por hasi aki na Aruba”.

Esaki segun Maduro, kende a sigui bisa cu Embahador di Hulanda a reuni cu Vice Presidente di Venezuela, unda cu entre otro a indica cu nan ta spera accion di parti di Aruba sigur, pasobra ta mustra manera cu Aruba ta esun di e 3 islanan cu ta mas prominente den e problematica aki.

E mandatario a sigui bisa cu Venezuela a indica cu e koper cu ta drenta Aruba for di Venezuela ta ilegal, unda cu e pais tin hopi problema pa loke ta hortamento di e cabelnan aki di koper.

Nan ta mira cu esaki ta yega Aruba y nan ta pidi accion.

“Tin un cantidad di producto tambe cu nan ta haya cu ta ilegal y no mag di Sali for di Venezuela, pero toch ta yega e supermercadonan na Aruba”.

“No tin un lista exacto si duna pa Venezuela, pero ta bay bin un reunion Diabierna awor di expertonan, caminda cu Venezuela lo tin cu bay duna claridad riba cua productonan nan ta considera ilegal”, segun e Minister di Finanzas, kende a indica cu relaciona cu esaki lo intensiva e control den e supermercadonan y riba e bendemento di producto riba caya.

Fuente: https://www.diario.aw - (PULSE AQUÍ)