miércoles, 31 de enero de 2018

Extra sancion di Comunidad Europeo a pone situacion di islanan cu Venezuela a escala

Situacion cu nos pais Venezuela ta sigui tenso y hopi delicado. E medida impone pa Venezuela pa cera trafico areo y maritimo entre Venezuela y Aruba ainda ta na vigor. E palabracionnan cu Gobierno di Aruba a haci pa prohibi importacion entre otro di koper y otro materialnan strategico cu no ta bin cu e documentonan necesario tambe ta na vigor.

Pa cual motibo Prome Minister a duna importancia pa para keto na e tema aki un biaha mas pa informa e pueblo di e situacion real. E mandatario ta indica cu keto bay conseho di biahe ta keda cu si no mester bay Venezuela, no bay.

Aunke tin cierto buelonan cu si ta logra trece nos hendenan back, pero e aerolinianan keto bay ta confrontando mas y mas problema pasobra e buelonan ta obliga pa bin back bashi pa motibo cu Venezuela no ta laga otro hende cu no tin nacionalidad Hulandes subi avion y esaki ta un perdida grandi pa e aerolinianan. Aerolineanan ya caba a cuminsa bati alarma pa cu e situacion aki.

Biahamento pa Venezuela no ta worde recomenda, cual ta causando hopi molester mas tanto tambe pa esnan cu ta bay Venezuela constant pa chekeo medico cual a bira hopi dificil y casi imposibel den e temponan aki. Y cu e situacion di PAWA na Santo Domingo ta complica e situacion un tiki mas.

Pa loke ta trata importacion di fruta y berdura, Prome Minister ta indica cu hunto cu importadornan, Gobierno ta haci tur posibel pa no tin scarcedad na Aruba y pa e productonan aki worde importa na un prijs no mucho mas halto cu anteriormente. Lo no bay mira cambio pa loke ta trata fruta y berdura cu ta bin caba for di Merca of di otro paisnan.

Prome Minister ta indica tambe cu e documento cu Gobierno di Aruba a negocia cu Venezuela ainda no a worde firma. Awo Venezuela a pone riba mesa cu e sancionnan cu Comunidad Europeo a impone riba Venezuela mester worde kita.

Union Europeo a pone e sancionnan riba 7 miembro di Gobierno di Venezuela. Esaki kiermeen cu momento cu e sancionnan aki bira ley y e 7 personanan aki tin cualkier pertenencia sea ta placa of posicion na Aruba, Gobierno lo mester bay over na vries esakinan.

Esaki sigur lo haci cu e situacion diplomatico entre Venezuela y Aruba ta bay escala mas ainda. Gobierno sinembargo ta vigila e situacion aki di cerca pa tuma accion si tin mester y ki momento esaki lo pasa.

E mandatario Principal di nos pais a bisa cu mientras tanto Gobierno di Aruba lo sigui delibera cu Venezuela pa sondea otro formanan pa lanta e embargo pa asina normalisa e relacion entre Aruba y Venezuela.

Prome Minister Wever-Croes no a laga e oportunidad pasa pa enfatisa cu e situacion entre Venezuela y Aruba ta hopi tenso y delicado diplomaticamente. Un situacion cu den ningun sentido ta normal. Gobierno di Aruba, como un gobierno serio y cu ta tuma situacionnan asina hopi na serio, ta trahando tur dia pa atende cu e crisis aki.

E Premier di Aruba a expresa su lamento cu tin cierto periodistanan cu ta opta pa haci un sensacion di e situacion delicado aki pa ataca su credibilidad door di cuestiona si su persona a bisa un cos of si Hulanda a bisa un cos, of si e politico Venezolano a bisa algo otro.

“Mi ta laga na bo mes pa dicidi ken bo kier kere. Si bo kier kere bo gobernante, bo ta ker’e. Si bo ta prefera pa scohe pa kere e politico Venezolano cu e situacion di e regimen cu e venezolanonan ta den actualmente, ta e decision pa cada ken scohe.

Pero Aruba ta para dilanti un crisis y retonan grandi pa loke ta trata e relacion entre Aruba y Venezuela y Gobierno ta tuma esaki hopi na serio.

Mi no ta kere cu tin espacio pa haci periodismo na un nivel baho asina. Ban enfoca riba e situacion real, riba e problema serio cu tin y riba con pa soluciona esaki mas pronto posibel, Prome Mininster Evelyn Wever-Croes a bisa.

Fuente: https://www.diario.aw - (PULSE AQUÍ)

No hay comentarios:

Publicar un comentario

Envíenos sus comentarios y aportes informativos al tema. Recuerde que su comentario, aunque no sea publicado, puede ser tomado en cuenta para nuestros temas de investigación. Los comentarios con términos insultantes, ofensivos, denigrantes y que incumplan nuestras políticas serán rechazados. Sólo puede enviar comentarios de menos de 1 mil (1.000) caracteres.

 
LO + LEÍDO...

LO + LEÍDO...