martes, 12 de diciembre de 2017

(Aruba) "Citgo a informa gobierno anterior cu business ta on going"

Segun ex minister y actual parlamentario, Richard Arends (AVP), placa di Refineria di Aruba (RdA), mester drenta na caha di gobierno. E ta un compromiso cu e compania petrolero Citgo a adkiri a base di e acuerdo di operacion di e refineria na San Nicolas. Parlamentario Arends kende a forma parti di e team cu a bay negosha cu Citgo durante e gobierno anterior, a laga sa cu RdA for di october ultimo te cu 31 di december a compromete di cumpli cu loke ta falta ainda, cu ta e suma di likidacion of ‘settlement sum’. Tambe pa e compra y transferencia legal di FMSA (Fuel Marketing Supply Aruba) ta wordo formalisa y pa RdA haci e transferencia economico pe. Kiermen pa RdA paga pa e accionnan di FMSA.

Igualmente el a laga sa cu durante e transicion di Valero pa Citgo nan a pone FMSA bou RdA como un subsidiario di e compania estatal aki. Ta asina cu gobierno a dicidi pa RdA bira cumprado pa e accionnan di FMSA. Pero RdA mester a bay den un proceso di refinanciamento pa adkiri e accionnan menciona. “Esey a wordo palabra pa e aña presupuestario aki.”

Parlamentario Arends a bisa cu prome cu final di aña presupuestario aki RdA lo cumpli cu e palabracion haci. P’esey e ex mandatario aki a bisa ‘cu e no tin ningun preocupacion cu esaki lo forma parti di e deficit’. Esaki ta algo cu a keda programa pa 2017 y aunke falta poco pa e aña aki caba, e tin pleno confiansa cu esaki lo sosode tambe.

Panorama Citgo
Tambe pa loke ta trata e reciente desaroyo di e compania Citgo, parlamentario Arends a indica cu prome cu nan a haci e traspaso di nan mandato na gabinete Wever-Croes, nan a ricibi notificacion cu e business ta on going’ y cu ta ‘it’s business as usual’.

E echo cu varios ehecutivo halto di Citgo, manera Nelson Martinez kende a yega di negosha cu e team di Aruba riba reapertura di e refineria, a keda deteni recientemente pa malversacion. Pero sr. Arends ta comenta cu esaki no lo bay tin efecto riba nan operacion riba nos isla. Nan a wordo reemplasa pa otronan, esaki no ta kita cu Citgo y RdA ta keda cu nan obligacionnan na Aruba. Nan no ta compania cu ‘bestuur los’, asina parlamentario Arends a bisa.

Despues di e reemplaso di e ehecutivonan grandi di Citgo, e compania aki ta sigui opera manera normal, e ta declara. Tambe el a recorda cu Citgo Petroleum ta doño di tres refineria na Merca, 6 terminal y tambe nan ta huur un refineria na Aruba.

Igualmente e parlamentario ta bisa cu Citgo a cumpli cabalmente te ultimo momento cu e gobierno anterior prome cu nan a baha. Te dia 16 di november ora cu su persona tabata encarga no solamente como minister di Economia, pero tambe como e mandatario encarga pa vigila e contract, Citgo tabata cumpli cabalmente riba e parti financiero y no financiero. E ta bisa cu Citgo ta paga e huur di e refineria na RdA, y tambe ta paga belasting na pais Aruba. Como esun cu tabata controla e entrada aki, e ta bisa cu e fondo aki tabata drenta tur 15 di luna riba cuenta di RdA.


Fondo operacion refineria
E placa aworaki mester drenta na departamento di Impuesto y Departamento di Financia cu ta un suma di 73 miyon florin cu ta inclui e parti di e suma di likidacion, tambe fondo cu Valero a paga na pais Aruba na momento cu a stop su operacion. Tambe tin e benta pendiente di FMSA cu a wordo menciona ariba cu ta e parti final di incorporacion di e empresa aki bou e mesun dak di RdA.

Pa loke ta e placa pa concepto di e suma di likidacion, sr. Arends ta bisa cu esaki tabata den inventario y tambe den e fuel cu tabatin den e tankinan. Na momento cu e fuel aki ta wordo bendi, RdA ta haya cash pe y asina cumpli cu e obligacion di e suma di likidacion y adkisicion di FMSA. Pero tambe e ta supone cu RdA lo busca financiamento manera cualkier maneho di un empresa -cu ta evalua loke tin den caha y loke nan mester fia – pa e cumpra di FMSA.

Considerando cu informacion internacional ta indica cu den compania Citgo tin mal maneho y malversacion di placa y cu nan ta pasando den un situacion dificil, e preocupacion ta con Aruba ta para si nan no ta cumpli?

Parlamentario Arends ta bisa cu obviamente tin sancion, ya cu e acuerdo ta hopi elabora ariba esey. Tambe tin un sistema di intermedia prome cu mester yega na sancion na momento cu Citgo no ta cumpli cu nan obligacion financiero na Aruba. Igualmente el a bisa cu tin e garantia tambe cu e compania madre na Merca a pone pa loke ta e cumplimento financiero di Citgo.

E ta recorda tambe cu Citgo no ta doño di e refineria sino cu nan ta huur. “Na momento di un dado caso of supuesto negado cu Citgo no por paga huur mas y ta keda sin cumpli e contract, nos ta keda cu un refineria y instalacionnan cu nos por huur atrobe.” Tambe nos tin e terminal di fuel cu e ta haya cu ta un facilidad cu nos por haci actividad comercial cu ne.

Gobierno nobo y falta di entrada
Minister di Financia, Xiomara Maduro (MEP) a laga sa cu mirando tur e compromiso financiero cu pais Aruba tin bou e supervision fiscal di CAft, gobierno di coalicion ta conta cu entrada di Refineria di Aruba (RdA). Si entrada di RdA no ta drenta den caha di gobierno, ya caba e mandatario a manifesta cu esaki ta trece preocupacion. El a indica cu e proceso pa e placa drenta a keda extendi ya cu e fondo aki mester a drenta caba. Un di e prome cos cu nan a haci tabata bati riba e porta di RdA pa wak si ya e fondo aki ta disponibel pa gobierno por cumpli cu su obligacionnan. Pero a yega un momento cu nan no a haya contesta, segun e mandatario. Minister Maduro ta laga sa cu e situacion aki tin nan atencion tambe.

Nan a bay tuma contacto cu RdA, pero na momento cu nan no a haya suficiente informacion, nan a bay papia cu e banco mes pa obtene mas informacion. Ya caba Banco Central di Aruba a refleha su incertidumbre caba riba e proyecto di refineria y su efecto riba nos crecemento economico.

Siman pasa den e mesun prome conferencia oficial di gobierno nobo na Bestuurskantoor, e mandatario di Financia a premira cu ya caba nan tin un buraco financiero cu ta core alrededor di 155 miyon florin pa 2017, plus esun di 2018 . E ta cualifica esaki como ‘un situacion hopi precario’. Specialmente si nos ta tene cuenta cu e parti di supervision financiero (CAft) ta stipula cu pa otro aña mester tin un surplus den nan presupuesto. Pero en bes di surplus, e ta mira un ‘deficit gigantesco’.

Fuente: Con información de https://www.bondia24.com - (PULSE AQUÍ)

No hay comentarios:

Publicar un comentario

Envíenos sus comentarios y aportes informativos al tema. Recuerde que su comentario, aunque no sea publicado, puede ser tomado en cuenta para nuestros temas de investigación. Los comentarios con términos insultantes, ofensivos, denigrantes y que incumplan nuestras políticas serán rechazados. Sólo puede enviar comentarios de menos de 1 mil (1.000) caracteres.

 
LO + LEÍDO...

LO + LEÍDO...