(Aruba) Trio envolvi den labamento di placa den galiña prepara condena na 4 aña di prison

Dialuna merdia Hof di Corte Superior, a dicta sentencia den e apelacion di e trio: R.H. Hulandes biba na Aruba, R.G. di Bonaire biba na Aruba, J.d S. di Aruba. Dia 10 di Juli 2017, Corte Superior a trata e apela caminda PG a pidi Hof pa confirma e castigo di 5 aña di prison pa cada un.

Durante tratamento di e caso algun siman pasa, Hof a puntra H., ariba kende su nomber e cargamento di galiña prepara for di Hulanda tabata bin Aruba, si e tabata sa cuanto placa ta bin. Segun H. e tabata sa cu tin placa den galiña pero no tabata sa e cantidad di placa. Hof a mustra cu awor ta promer biaha cu e ta bisa esaki. Hof a puntra cuanto biaha a transporta, el a bisa cu ta 5 biaha. Hof a mustra cu segun investigacion ta papia di 10 container. Segun H. no ta den tur container tabatin placa.

Hof a puntra H. kico su funcion ta. El a bisa cu su funcion tabata pa percura cu e galiñanan ta bay pa un persona na Aruba. E tabata paga pa e container cu galiñanan prepara y e container tabata wordo hiba na su restautant. E tabata wordo paga pa haci esaki.

E acusado d S. a bisa cu el a apela pasobra e ta sera por nada. E ta para riba cu e no tin nada di haci cu e caso aki. Hof a mustra cu tin indicacionnan fuerte cu e ta envolvi den e transporte di galiña y placa. Hof a mustra cu e homber v R. di Hulanda, cu tin contacto cu H., lo a duna declaracion contra d S. Hof a puntra si d S. ta wordo yama “e rabo”. Hof a bisa cu v R. a reconoce d S. riba potret y ta bisa cu e ta wordo yama “e rabo”. Segun d S. el a conoce v R. mas o menos 3 aña pasa na Hulanda pero nunca a papia tocante di placa. Hof a mustra cu v R. ta papia cu a reuni cu G. y d S. y cu den e container tabatin 60 mil Euro.

E acusado d S. a bisa Hof cu e no sa nada di container. El a splica cu e ta biba na Venezuela y cu na Aruba e ta huur apartamento cu su tata a laga p’e. d S. a bisa cu ora el a cay sera su señora a bin Aruba y via abogado a bin haya potret di badkuip na su cas yena cu galiña prepara di Hulanda. Segun d S. e sa laga su yabinan den auto di G.

a bisa cu e no sa di galiña prepara den badkuip den cas di d S. Hof a bisa cu e potret di esaki a haya den cellular di H.

EXIGENCIA DI PG

PG a a pidi Hof pa confirma e sentencia di Corte den Promer Instancia.

E ta haya legalmente proba e promer acusacion esta cu entre 1 Augustus 2013 y 24 Juni 2015, e trio aki a laba placa hunto. E suma total ta 23.352.500 Euro o sea mas cu 23.3 Miyon Euro.

a pidi pa mantene e castigo di 5 aña di prison y cu e 60 mil Euro cu entre otro a confisca di J.d S., e 60 mil Euro cu tambe a confisca di R.G. y e 73 mil Euro cu a confisca di R.H. ta keda confisca. Esaki pasobra a sali na cla cu e sumanan aki ta procedente di labamento di placa.

SENTENCIA

Ayera merdia Hof di Corte Superior a dicta sentencia. Hof ta haya e trio aki culpable di labamento di placa entre 1 Augustus 2013 y 24 Juni 2015.

Hof evaluando tur cos a reduci e castigo. Corte den Promer Instancia a condena e trio na 5 aña di prison y ayera a scucha Hof condena e trio na 4 aña di prison, kitando e tempo cu nan tin sera. E placanan cu a confisca lo keda confisca.

Fuente: https://www.diario.aw