(Aruba) Tin mas cu un motibo di preocupacion den pueblo tocante CITGO Aruba

Tin informacionnan cu ta saliendo internacionalmente tocante e situacion penoso di e industria petrolero di Venezuela, y Matutino DIARIO ta sigui haya yamada di personanan preocupa, pasobra nan no sa, ni gobierno ta dunando informacion, con PDVA-Citgo ta para na Aruba.

Recientemente OPEP (Organizacion di Paisnan Exportador di Petroleo) ta laga sa rond mundo cu PDVSA a stop di produci un miyon mas 450 mil bari entre aña 2002 te na 2017.

OPEP ta papia di un desaster y nan a stop di ricibi 15 mil miyon di dollar anualmente. Esaki pa motibo di un desorden administrativo y falta di mantencion di PDVSA segun expertonan di OPEP.

Den nos comunidad hopi hende ta confundi y nan kier sa kico ta e diferencia cu e refineria Citgo Aruba, pasobra te na unda nan ta Citgo ta wordo maneha pa PDVSA of Citgo ta maneha PDVSA, pero di un of otro manera ta mustra mesun cos.

Pa colmo tin un critica ta wordo haci pasobra e industria ta sigui viola locual a wordo establece den e Constitucion di e Republica Bolivariana di Venezuela y den e ley organico di hidrocarburo, pero e gobierno ta sigui modifica e capital di accionnan di PDVSA pa dune na empresanan mixto.

Y tur e negociacionnan aki ta sosode tras di lomba. Ademas, nan ta tumando placa fia for di e compania ruso Rosneft, cual lo wordo paga den futuro cu petroleo y tin rumor cu e refineria na Aruba ta un di e canalnan pa haci esaki. Hasta tin e version cu PDVSA y su filialnan completo ta bay wordo pasa na man di Rusia y e pregunta ta for di ken anto e Gobierno di Aruba lo haya beneficio si ta asina cu nos Isla di berdad lo wordo beneficia?

Nos fuente di informacion ta referi na tur esaki como hechonan completamente ilegal y di corupcion cu ta tumando lugar cu e maneho di e refineria, cu tambe ta subraya cu na momento cu e asunto constitucional na Venezuela wordo restablece, tur negociacion cu exterior lo keda anula, entre nan posiblemente, e acuerdo cu Aruba.

Cu otro palabra, pueblo kier sa ki dia e operacionnan di CITGO na Aruba ta cuminza cu por mira movecion, y kico gobierno tin di bisa di tur e noticianan aki cu ta saliendo rond mundo. (PULSE AQUÍ PARA VER MÁS)

Fuente: Con información de http://www.diario.aw